Netflix компани зардлаа хэмнэх шинэ арга замын хүрээнд өөрсдийн бүтээлд хиймэл оюуны (AI) технологийг анх удаа ашигласан тухайгаа албан ёсоор мэдэгдлээ.
Тус компанийн дэд гүйцэтгэх захирал Тед Сарандосын мэдээлснээр, Аргентины шинжлэх ухааны уран зөгнөлт төрлийн “The Eternaut” нэртэй телевизийн цувралд гардаг барилга нурж буй хэсгийг хиймэл оюуны тусламжтайгаар бүтээжээ. Уг туршилтаар уг хэсгийг богино хугацаанд, бага зардлаар өндөр чанартайгаар гаргаж чадсан нь Netflix-ийн түүхэнд хиймэл оюун ухаан ашигласан анхны тохиолдол болсон байна.
Хэдий тийм боловч энтертайнмент салбарт хиймэл оюуныг ашиглах нь хууль эрх зүйн болон ёс зүйн маргаантай сэдэв хэвээр байгааг мэргэжилтнүүд анхааруулсаар байна. Тухайлбал, уран бүтээлчдийн зөвшөөрөлгүй контент үүсгэх, ажил мэргэжлийг орлох эрсдэл зэрэг нь тус технологийн сөрөг талыг илтгэдэг.
Netflix мөн 2025 оны хоёрдугаар улирлын санхүүгийн тайлангаа танилцуулсан бөгөөд 6-р сарын эцсийн байдлаар компанийн нийт орлого өмнөх жилийн мөн үетэй харьцуулахад 16 хувиар нэмэгдэж, 11 тэрбум ам.долларт хүрчээ. Ашиг ч мөн өсөлттэй гарч, 2.1 тэрбум ам.доллараас 3.1 тэрбум ам.доллар болсон байна.
Энэхүү өсөлтийн гол шалтгаан нь Өмнөд Солонгосын алдарт “Squid Game” цувралын гурав дахь, сүүлийн бүлгийн өндөр амжилттай холбоотой бөгөөд уг цуврал нийт 122 сая гаруй удаагийн үзэлт авч, Netflix-ийн хандалтыг огцом өсгөсөн гэж тус компани онцолсон байна.
2 комментария
Netflix үнэхээр ирээдүйг авч ирж байна шүү! Хиймэл оюуныг кинонд ашиглана гэдэг сонирхолтой сонсогдож байна
Үзэгчдэд мэдэгдэхгүйгээр AI ашиглах нь гоё санаа байна. Харин жүжигчдийн ажлын байрыг хэрхэн хамгаалах бол?