Наймдугаар сарын 22-24-ний өдрүүдэд Налайх дүүргийн Тайж хайрхан уулын бэлд “Нүүдэлчин” дэлхийн соёлын фестиваль зохион байгуулагдаж байна. Уг арга хэмжээ нь ЮНЕСКО-гийн “Соёлын биет бус өвийг хамгаалах тухай” 2003 оны конвенц, Соёлын өвийг хамгаалах тухай хуулийн 39.2 дугаар заалт, мөн Засгийн газрын 2024 оны 41 дүгээр тогтоолын хэрэгжилтийн хүрээнд жил бүр уламжлал болгон зохион байгуулагддаг.
Энэ жилийн фестиваль нь Монголын угсаатны бүлэг бүрийн өвөрмөц онцлог, соёлын биет бус өвийг сурталчлах зорилготой бөгөөд бүсчилсэн хөгжлийн үзэл баримтлалд тулгуурлан отог хэлбэрээр өрнөж байна.
Фестивалийн онцлох үйл ажиллагаа:
- Соёлын биет бус өвийн 780 арга хэмжээ
- Үндэсний спортын 5 төрлийн уралдаан, тэмцээн
- Аймаг, нийслэлийн отгуудын оролцоо
- “Соёлын өвийн өртөө” болон “Нүүдэлчдийн ертөнц: Өнгөрсөн ба ирээдүй” олон улсын эрдэм шинжилгээний хурал
- “Жуулчны хоолны гудамж”, “Жижиг дунд үйлдвэрлэлийн үзэсгэлэн худалдаа”
Мөн өвлөн уламжлагчдаас соёлын биет бус өвийн оршин тогтнох чадварын талаарх мэдээллийг цуглуулан дүн шинжилгээ хийх ажил үргэлжилнэ.
Фестивалийн хүрээнд зохиогдох “Морьт харваа”-ны 17 дахь удаагийн Дэлхийн аварга шалгаруулах тэмцээн онцгой анхаарал татаж байна. Тус тэмцээнд 30 гаруй улсын 120 гаруй шилдэг харваачид, Монголын 15 шилдэг харваач оролцох бөгөөд олон улсын зэрэглэлтэй шүүгчид, ЮНЕСКО болон Дэлхийн морьт харвааны холбооны удирдлагууд хүрэлцэн иржээ.
