БНСУ-ын алдарт “AKMU” хамтлаг өнгөрсөн онд Улаанбаатар хотын Багахангай дүүргийн нөхөн сэргээлтийн талбайд 1000 ширхэг чацарганы мод тарьж, түүнийг “AKMU Хайрын ой” хэмээн нэрлэжээ. Энэ үйл ажиллагааг хамтлагийн 10 жилийн ойтой нь давхцуулан зохион байгуулсан бөгөөд Монгол орны цөлжилттэй тэмцэх зорилгоор модоо хандивласан байна.
“AKMU” хамтлаг нь ах дүүс болох И Чан Хюк, И Су Хюн нарын бүрэлдэхүүнтэй бөгөөд тэд анх 2012 онд “K-pop Star 2” шоугаар олон нийтэд танигдсан. Тус тэмцээний ялагч болж, 2014 онд алдарт YG Entertainment компанитай гэрээ байгуулан, “Play” нэртэй анхны цомгоо гаргаснаар K-pop ертөнцөд албан ёсоор хөл тавьжээ.
“200%”, “Give Love”, “Melted” зэрэг дуу нь тухайн үедээ хит болж, хамтлагийн өвөрмөц хэв маяг, уянгалаг хөгжим нь сонсогчдын хайр хүндэтгэлийг хурдацтай хүртсэн юм.
