Өмнөд Солонгосын цагдаагийн газар дэлхий дахинд Gangnam Style хитаараа алдаршсан дуучин Psy (жинхэнэ нэр нь Пак Чжэ Сан)-ийн эсрэг мөрдөн шалгалт явуулж байна.
Yonhap агентлагийн мэдээлснээр, түүнийг сэтгэцэд нөлөөлөх эмийн жор хууль бусаар авсан хэрэгт буруутгажээ. Цагдаа нар уран бүтээлч болон түүний эмчийг хууль зөрчсөн байж болзошгүй үндэслэлээр баривчилсан байна.
Мөрдөн байцаалтын явцад тогтоосноор Psy 2022 оноос хойш Сөүл хотын нэгэн эмнэлгээс Xanax (алпразолам) болон Stilnox (золпидем) гэх эмүүдийг жороор авч байсан бөгөөд эдгээр нь нойргүйдэл, түгшүүр, сэтгэл гутралын үед хэрэглэгддэг. Гэвч эмнэлгийн шаардлагатай хувийн үзлэгийг алгассан, харин жорыг түүний нэр дээр гуравдагч этгээдүүд, тэр дундаа менежер нь авч байсан гэж үзэж байна.
Эдгээр эм нь өндөр донтуулах эрсдэлтэй тул эмчийн хатуу хяналт зайлшгүй шаардлагатай гэж хуульд заасан байдаг. Харин дуучны эмч буруугүй гэж мэдэгдэж, зөвлөгөө уулзалтуудыг алсаас хийсэн гэж тайлбарласан.
Psy-ийн өөрийнх нь байгуулсан P Nation агентлаг уг үйл явдлыг “илт алдаа” хэмээн хүлээн зөвшөөрч, уучлал хүссэн байна. Тэдний мэдээлснээр дуучинд архаг нойргүйдлийн онош тавигдсан бөгөөд эмчийн заавраар снотвор эм хэрэглэдэг ч зарим тохиолдолд эмийг гуравдагч этгээд түүний нэрээр авсан нь буруу байсан гэдгийг онцолжээ.
Psy бол Өмнөд Солонгосын алдарт дуучин, дуу зохиогч бөгөөд хошин өнгө аястай клипүүдээрээ танигдсан. Тэрээр 2012 онд гаргасан Gangnam Style дуугаараа олон улсын хэмжээнд нэр хүнд олж, YouTube-д анх удаа 1 тэрбум үзэлт давсан түүхэн амжилт байгуулсан юм.
