“Black Sabbath” хамтлагийн гоцлол дуучин, хүнд металл хөгжмийн домог Оззи Осборн 76 насандаа таалал төгссэнийг түүний гэр бүл баталлаа.
2019 онд Паркинсоны өвчтэй гэж оношлогдсон тэрээр хоёр долоо хоногийн өмнө Английн Бирмингэм хотод сүүлийн удаа тайзан дээр гарч тоглосон байв.
Хард рокоос үндэслэсэн хүнд металлын урсгалын анхдагчдын нэг болох Осборны “Black Sabbath” хамтлаг 1970-аад онд дэлхий даяар асар их амжилт олж, хөгжмийн ертөнцөд шинэ хуудас нээжээ.
“Харанхуйн Ханхүү” хэмээн алдаршсан тэрээр нэг удаа тайзан дээр сарьсан багваахайн толгойг хазаж, олон нийтийг гайхшруулсан түүхтэй.
1948 оны 12-р сарын 3-нд Бирмингэмд Жон Майкл Осборн нэртэй төрсөн тэрээр 15 насандаа сургуулиа орхиж, төрөл бүрийн ажил хийж байв. Тэр дундаа үйлдвэрт ажиллаж байсан туршлагатай.
Дараа нь тэрээр сургуулийн анд Гизер Батлертой хамтран хөгжмийн замналаа эхэлсэн юм.
Осборн “The Osbournes” нэртэй реалити шоугаар дамжуулан гэр бүлийн амьдралаа дэлхий нийтэд харуулж, улам алдаршжээ.
Саяхан тэрээр төрөлх Бирмингэм дэх Вилла Парк цэнгэлдэхэд 42,000 шүтэн бишрэгчийн өмнө салах ёсны тоглолтоо хийсэн.
“Энэ бол хамгийн сүүлчийн дуу. Та бүхний дэмжлэг бидэнд гайхалтай хэв маягаар амьдрах боломжийг олгосон юм. Чин сэтгэлээсээ баярлалаа” гэж тэр хамтлагийнхаа хамгийн алдартай “Paranoid” дууг дуулсны дараа хэлжээ.
Jane’s Addiction хамтлагийн Дэйв Наварро 2010 онд “Rolling Stone” сэтгүүлд “Black Sabbath бол хүнд металлын Битлз юм. Металл хөгжим сонсдог хүн бүр ингэж хэлнэ” гэж бичжээ.
Осборн амьдралынхаа туршид хоёр удаа гэрлэж, зургаан хүүхдийн аав болсон. Тэрээр 1982 оноос эхнэр Шэронтойгоо хамт амьдарч, Кэлли, Эйми, Жэк хэмээх гурван хүүхэдтэй болжээ.
