Өмнөд Солонгосын “2NE1” хамтлагийн гишүүн Пак Бом өөрийн хуучин агентлаг “YG Entertainment” болон түүний гүйцэтгэх продюсер Ян Хён Сук-ийн эсрэг хэрэг мэдүүлсэн тухайгаа ил болголоо.
Гомдол, шалтгаан
Пак Бом лхагва гарагт цахим хуудсандаа “Пак Бомоос” хэмээх гарчигтай нийтлэл болон өөрийн гараар бичсэн гомдлын баримт бичгийн зургийг нийтэлсэн байна.
Түүний бичсэнээр Ян Хён Сук түүнийг удаан хугацаанд залилан мэхэлж, уран бүтээлийн орлогоос нь зохих төлбөрийг төлөөгүй гэнэ. Үүнд шинэ дуу, тоглолт, нэвтрүүлэг, сурталчилгаа болон бусад уран бүтээлээс олсон ашгийн төлбөрүүд бүгд хамрагдсан байна.
“Би шинэ дуу, тоглолт, арга хэмжээ, дууны найруулга бүрээс орлого олсон ч надад нэг ч санхүүгийн тайлан ирээгүй. Миний орлогыг удаан хугацаанд нуусан”
— гэж тэр бичжээ.
Пак Бом нийт хохирлын хэмжээг 4.5 квадриллион вон (ойролцоогоор 3.2 их наяд ам.доллар) гэж тэмдэглэсэн нь олон нийтийн гайхшралыг төрүүлэв.
Олон нийтийн хариу ба эргэлзээ
Энэхүү дүнг бодит бус гэж үзсэн хүмүүсийн дунд төөрөгдөл үүсэж, зарим нь Пак Бомын эрүүл мэндийн байдалд эргэлзэх байр суурь илэрхийлжээ.
Удалгүй дуучин уг нийтлэлээ устгаж, дараах үгтэй шинэ бичвэр оруулсан байна.
“Пак Бом ‘YG’-г үзэн яддаг. Интернет хэрэглэгчид ээ, ‘YG’ надад юу хийснийг сайн олж мэдээрэй. Баярлалаа.”
Түүнчлэн Пак Бом уруулын будаг түрхсэн нохойныхоо зургийг нийтэлж, “Пак Бом. Уруулын будаг өгсөнд баярлалаа” гэсэн тайлбар бичсэн нь олон нийтийг бүр ч их гайхшруулжээ.
“YG Entertainment”-ийн хариу мэдэгдэл
“YG Entertainment”-ийн төлөөлөгч дараах мэдэгдлийг хийсэн байна.
“Бид Пак Бомтой холбоотой бүх санхүүгийн тооцоог аль хэдийн бүрэн дуусгасан.
Одоогоор ямар нэгэн хэрэг, зарга үүсээгүй. Түүний цахим сүлжээнд гаргаж буй үйлдэлд эргэлзэж байна.”
Сүүлийн үеийн байдал
Пак Бом өнгөрсөн наймдугаар сард эрүүл мэндийн шалтгаанаар хамтлагаа түр орхисон гэж мэдэгдсэн. Үүнээс өмнө тэр нийгмийн сүлжээнд хийсэн эмх замбараагүй нийтлэлүүдээрээ олны анхаарлыг татаж байсан юм.
