Холливудын медиа ертөнцөд шинэ хөзөр хольж байна
Кино, телевизийн салбарын гигант “Paramount” компани “Warner Bros Discovery”-г худалдан авах санал тавьжээ. Энэхүү санаачилгын ард технологийн тэрбумтан Ларри Эллисон болон түүний гэр бүл байгаа гэж The Wall Street Journal мэдээлэв.
Санал ба хэлэлцээний явц
“Paramount” тал “Warner Bros Discovery”-ийн нэгж хувьцааг 20 ам.доллараар үнэлсэн санал хүргүүлсэн боловч компанийн удирдах зөвлөл уг үнийг бодит үнэлгээнд хүрэхгүй гэж үзэн татгалзсан байна. Гэсэн хэдий ч хэлэлцээ үргэлжилж байгаа бөгөөд “Paramount” илүү өндөр санал гаргахаар төлөвлөж байна. Хэрэв хэлцэл амжилттай болбол HBO, CNN, Warner Bros зэрэг томоохон брэндүүд нэг корпорацийн дор нэгдэх бөгөөд медиа салбарт шинэ “супер тоглогч” төрөх төлөвтэй байна.
Эллисон гэр бүлийн медиа нөлөө
Ларри Эллисоны хүү Дэвид Эллисон 2024 онд “Skydance Media”-г 8 тэрбум ам.доллараар худалдан авч, энэ зун “Paramount” компанийн хяналтын хувьцааг эзэмших болсон. Ийнхүү Эллисоны гэр бүл энтертайнмент салбар дахь хамгийн нөлөө бүхий шинэ хөрөнгө оруулагчдын нэг болжээ. “Paramount” сүүлийн саруудад хэд хэдэн стратегийн томоохон хэлцэл хийсэн бөгөөд үүний нэг нь UFC-гийн медиа эрхийг 7.7 тэрбум ам.доллараар худалдан авсан явдал юм. Энэ нь компанийн олон талт, технологид тулгуурласан медиа стратегийн нэг хэсэг гэж шинжээчид дүгнэж байна.
“Warner Bros Discovery”-ийн бүтэц шинэчлэгдэнэ
“Warner Bros Discovery” ирэх 2026 оны дөрөвдүгээр сар гэхэд үйл ажиллагаагаа хоёр тусдаа нэгжид хуваахаар төлөвлөж байгаа. Эхний нэгжид HBO, HBO Max болон Warner Bros. студи багтах бөгөөд үүнийг Гүйцэтгэх захирал Дэвид Заслав удирдана. Харин хоёр дахь нэгж нь Discovery Global нэртэй болж, кабелийн сувгуудыг төв болгосон бүтэцтэй байх юм. Энэ өөрчлөлт нь “Paramount”-ын худалдан авах үйл явцыг хурдасгах нэг хүчин зүйл гэж үзэж байна.
Дэлхийн медиа салбарт хүчний шинэ тэнцвэр
Одоогоор “Warner Bros Discovery”-ийн үнэлгээ 42 тэрбум ам.доллар, харин “Paramount” компанийн үнэлгээ 18.5 тэрбум ам.доллар байна. Хэрэв хэлцэл биелбэл дэлхийн медиа салбар дахь эрх мэдлийн шинэ тэнцвэр тогтож, стриминг болон контент үйлдвэрлэлийн өрсөлдөөнд томоохон өөрчлөлт авчрах төлөвтэй байна.
