Цагдаагийн мөрдлөг эхэлсэн ч шинжилгээний дүн сөрөг гарсан
Өмнөд Солонгосын залуу рэп дуучин D.Ark (жинхэнэ нэр Ким У Рим) хар тамхи хэрэглэж, зарсан гэх хэргээр баривчлагдсан тухай NewDaily сонин мэдээллээ. Мокпхо хотын цагдаагийн газраас уг хэргийн мөрдөн шалгах ажиллагааг эхлүүлээд байгаа аж.
Мэдээлснээр, D.Ark нь марихуан хэрэглэсэн, бусдад борлуулсан гэх хэргээр сэжиглэгдэж байгаа ч тэр өөрийн бурууг үгүйсгэж байгаа юм.
Агентлагийн мэдэгдэл: “D.Ark гэмгүй”
Дуучны харьяалагддаг агентлаг албан ёсны мэдэгдэл гаргаж, дараах тайлбарыг хийжээ.
“D.Ark-ийн биеэс авсан шинжилгээний хариу сөрөг гарсан. Тэр ямар нэгэн хар тамхи хэрэглээгүй бөгөөд уг хэрэгт холбоогүй гэдгийг бид баттай хэлж чадна. Одоогоор цагдаагийн мөрдөн шалгах ажиллагаанд бүрэн хамтран ажиллаж байна” гэж мэдэгдсэн байна.
Рэп ертөнцийн залуу од
Хятадын Яньцзи хотод төрж, Солонгос гаралтай D.Ark 2018 онд “Show Me The Money 777” шоунд оролцсоноор анх олонд танигдсан. Улмаар 2021 онд “High School Rapper 4” нэвтрүүлэгт гуравдугаар байр эзэлж, реп урлагийн шинэ үеийн төлөөлөл болж байв. Тэр жилдээ өөрийн анхны мини цомог “EP1 Genius”-ийг гаргаж, мэргэжлийн урлагийн карьераа эхлүүлжээ.
Олны анхаарал дахин түүнд төвлөрөв
D.Ark өмнө нь хэд хэдэн хэл аманд орж байсан ч уран бүтээлдээ анхаарч, идэвхтэй ажиллаж байв. Харин энэ удаагийн хэрэг түүнийг дахин олны анхаарлын төвд авчирч байна.
Одоогоор мөрдөн шалгах ажиллагаа үргэлжилж байгаа бөгөөд шинжилгээний нэмэлт дүн болон албан ёсны шийдвэрийг ойрын өдрүүдэд олон нийтэд мэдээлэх төлөвтэй байна.
