Ирландын дуу зохиогч Рэй Хеффернан Британий дуучин Робби Уильямсын эсрэг шүүхэд нэхэмжлэл гаргахаар болжээ. Тэрээр Angels дууны борлуулалтын орлогоос гуравны нэгийг нэхэмжилж байна.
1997 онд гарсан энэ дуу өнөөг хүртэл Робби Уильямсын хамгийн алдартай бүтээлүүдийн нэг хэвээр байна. Angels дуу нь түүнийг Take That хамтлагаас 1995 онд гарснаас хойш бие даасан карьертаа амжилт олоход чухал үүрэг гүйцэтгэсэн. Британийн хэвлэлүүдийн мэдээлснээр энэ дуу Spotify дээр 700 мянга орчим удаа сонсогдсон бөгөөд 1.8 сая гаруй тоон болон физик хуулбар нь худалдаалагджээ.
Хеффернан өөрийгөө Angels дууны анхны зохиогч гэж мэдэгдэж, Робби Уильямст дуулж өгсөн бөгөөд дараа нь хамтдаа демо хувилбар бичсэн гэж хэлсэн байна. Гэсэн ч 1997 онд албан ёсоор дуу гаргах үед түүний нэрийг дурдсангүй. Тэр үед Хеффернан зохиогчийн эрхээсээ татгалзаж, ердөө 7 500 фунт стерлинг (ойролцоогоор 10 100 ам.доллар) авсан аж.
Одоо тэрээр ЕХ-ны зохиогчийн эрхийн хуулийн «бестселлерийн заалт»-ыг ашиглахаар төлөвлөж байгаа бөгөөд энэ нь бүтээл худалдаанд амжилт олсон тохиолдолд зохиогч багахан хөлсөөр эрхээ өгсөн бол нэмэлт нөхөн төлбөр шаардах боломж олгодог.
Робби Уильямс өмнө нь Angels дууг ихээхэн өөрчилсөн гэж мэдэгдэж, Рэй Хеффернаныг хамтран зохиогч гэж хүлээн зөвшөөрдөггүй байв.
1 comment
Робби Уильямсын карьерын хамгийн том хит дуу учраас орлогын асуудал их маргаан дагуулах нь ойлгомжтой юм