Поп дуучин Сабрина Карпентер “Rolling Stone” сэтгүүлд өгсөн ярилцлагадаа ирээдүйн тоглолтуудаа гар утасгүй орчинд явуулах боломжийн талаар нухацтайгаар бодож буйгаа хуваалцлаа. Тэр энэ санааг “фэнүүдийнхээ дургүйг хүргэх гэж байгаа юм биш шүү” хэмээн хошигнож байсан ч, утасгүй орчин нь хөгжмийн тоглолтыг жинхэнэ утгаар нь мэдэрч, илүү гүн гүнзгий хүлээн авах боломжийг үзэгчдэд олгодог гэж үзэж буйгаа онцолсон.
Санааны эх үүсвэр нь Лас Вегас хотод болсон Silk Sonic-ийн (Bruno Mars болон Anderson .Paak) тоглолт байжээ. Тэнд үзэгчид гар утсаа тусгай битүү саванд хийж, Bruno Mars “We Took Your Phones Away” дуугаараа тоглолтыг эхлүүлсэн байна. Энэ туршлага Сабринагийн хувьд утасгүй орчны гайхалтай жишээ болжээ.
Гэсэн хэдий ч энэ санаа шүүмжлэл дагуулж эхэлсэн. Зарим хүмүүс гар утасгүй орчин нь үзэгчдийн эрх чөлөөг хязгаарлаж, яаралтай үед холбоо барих боломжгүй болгоно гэж үзэж байна. Түүнчлэн тоглолтын дурсамжийг зураг, бичлэгээр хадгалдаг фэнүүдийн зүгээс ч сөрөг хандлага гарахыг үгүйсгэхгүй юм.
Сабрина Карпентер энэхүү санааг одоогоор албан ёсоор хэрэгжүүлэх шийдвэр гаргаагүй ч, ирээдүйд хэрэгжиж болох хувилбаруудын нэг хэмээн үзэж буйгаа хэлсэн.
