Сөүл дэх цомхон хуримын тов тодорлоо
Өмнөд Солонгосын кино, загварын ертөнцийн хамгийн их хайр хүлээсэн хосуудын нэг болох Шин Мина, Ким Ү Бин нар арван жилийн харилцааныхаа дараа албан ёсоор гэр бүл болох болсныг албан ёсоор зарлалаа.
Сөүл хотод байрлах жүжигчдийн агентлагууд өнөөдөр хамтарсан мэдэгдэл гаргаж, хос хоёр ирэх оны 12 дугаар сарын 20-нд гэр бүл, ойрын найз нөхдийн хүрээнд цомхон хуримын ёслол хийхээр төлөвлөснийг мэдэгдэв.
Шин Минагийн агентлаг “AM Entertainment” хосын хуримыг олны анхаарлын төвд бус, аль болох тайван, дотогшоо уур амьсгалтайгаар хийхээр төлөвлөж буйг онцлон, хэвлэлийнхнийг хүндэтгэн ойлгохыг хүсжээ.
Ким Ү Биний гараар бичсэн захидал: “Тийм ээ, би гэрлэх гэж байгаа”
Ким Ү Бин өөрийн шүтэн бишрэгчдэд зориулан фэн форум дээрээ гараар бичсэн захидал нийтэлж, энэ баярт мэдээгээ өөрийн амнаас нь баталсан. Тэр захидалдаа:
“Тийм ээ, би гэрлэх гэж байгаа. Миний бие удаан хугацааны турш хамт байсан хүнтэйгээ гэр бүл зохиож, хамтдаа аяллаа үргэлжлүүлэх болно” хэмээн бичиж, олон жил нэгнээ дэмжиж, түшиж ирсэн хүнтэйгээ амьдралын шинэ үе шат руу хамт шилжиж байгаагаа тодотгосон байна.
Мөн тэрээр энэ чухал үед нь дэргэд нь байсан, үргэлж дэмжиж ирсэн фэнүүдээсээ цаашид ч хайр, дэмжлэгээ харамлахгүй байхыг хүсэж, амьдралынхаа том өөрчлөлтийг ил тод хуваалцсандаа талархаж буйгаа илэрхийлжээ.
Арван жилийн турш үргэлжилсэн хайр
Хос хоёрын түүх 2014 оны нэгэн сурталчилгааны зураг авалтаас эхэлдэг. Тухайн үед тэд хамтран ажиллах явцдаа бие биедээ татагдаж, 2015 оноос албан ёсоор уулзаж, болзож эхэлсэн нь олонд ил болсон юм.
Тэдний харилцаа олны нүдний өмнө байсан ч элдэв дуулиан шуугиан багатай, нам гүм, бат бөх холбоогоороо бусад од хосуудаас онцгойрдог байв. Ялангуяа Ким Ү Бин 2017 онд хамар, нармайн хорт хавдартай гэж оношлогдож, урлагийн карьераа түр завсарласан үед Шин Мина түүнд чимээгүйгээр түшиг тулгуур болж, хамтдаа туулж гарсан нь олон хүний сэтгэлийг хөдөлгөсөн.
Хосын карьераас нэг хэсэг
41 настай Шин Мина 1998 онд загвар өмсөгчийн хувиар урлагийн гараагаа эхэлсэн бөгөөд түүнээс хойш кино, телевизийн салбарт шилжиж, олон хит бүтээлээрээ үзэгчдийн танил болсон. Сүүлийн жилүүдэд тэрээр “Netflix”-ийн нууцлаг триллер жанрын “Karma” цувралд тоглосноороо дахин анхаарлын төвд орсон.
36 настай Ким Ү Бин мөн загварын ертөнцөөс гаралтай. 2008 онд моделийн гараагаа эхлүүлсэн тэрбээр телевизийн олон ангит цуврал, нийтийн дуртай кинонуудад тоглож, богино хугацаанд өөрийн үеийнхээ хамгийн алдартай залуу жүжигчдийн нэг болсон. Эрүүл мэндийн шалтгаанаар завсарлага авсны дараа тэр 2022 онд “Alienoid” уран зөгнөлт киноороо дэлгэцнээ эргэн ирсэн бол түүний гол дүрд нь тоглосон “Netflix”-ийн “Genie, Make a Wish” цуврал энэ аравдугаар сард үзэгчдийн хүртээл болсон билээ.
Фэнүүдийн мэндчилгээ ба хүлээлт
Шин Минагийн агентлаг шүтэн бишрэгчдэд хандан, хосын амьдралын энэхүү шинэ шатанд:
“халуун дулаан мэндчилгээ, ерөөл илгээхийг” хүссэн нь олон нийтийн сүлжээнд эерэг уур амьсгал, баяр хүргэсэн сэтгэгдлүүдийг улам нэмэгдүүлж байна.
Солонгосын урлагийн хоёр том одын дээрх мэдээг сонссон фэнүүд “арван жилийн хайр эцэстээ үр дүнгээ өглөө”, “өнгөрсөн хэцүү жилүүдийн дараа хамгийн сайхан шагнал”, “хамтдаа урт удаан жаргаарай” хэмээн бичиж, хуримын өдрийг тэсэн ядан хүлээж байна.
