2025 оны 8-р сарын 5 — Монголын хип хоп урлагийн ноён оргил “IceTop” болон Нью-Йоркийн домогт хамтлаг “Onyx” энэ баасан гарагт Төв цэнгэлдэх хүрээлэнд нэгэн түүхэн үдэш хуваалцах гэж байна. “Шүтээн минь” нэртэй энэхүү тоглолт нь хип хоп соёлыг амьдруулж, үзэгчдэд жинхэнэ эрч хүч, хэмнэлийг мэдрүүлэх зорилготой.
Энэ бол зүгээр нэг тоглолт биш — Монголд урьд өмнө нь босгогдоогүй хамгийн том тайз бэлэн болж, хөгжмийн урсгал бүрийн зүрх болсон хип хопын амьсгал Төв цэнгэлдэхэд цохилох гэж байна.
“IceTop” хамтлаг өнгөрсөн хугацаанд монголын тайзны урлагт шинэлэг хандлага, уран бүтээлийн эрчимтэй хувьслыг авчирсаар ирсэн. Тэдний тоглолт бүр бэлтгэл, уран бүтээл, үзэл санааны хувьд өндөр түвшинд байдаг. Харин энэ удаагийнх бол өмнөх бүх тоглолтын цогц, оргил үе нь болохоор төлөвлөгдөж байгаа юм.
Харин “Onyx” бол олон улсын хип хопын тайзнаа нэр хүндтэй байр суурь эзэлдэг, Нью-Йоркийн гудамжнаас ургасан жинхэнэ эрч хүч, туршлагыг тээж ирж буй хамтлаг юм. Тэдний ирэлт IceTop-ийн уур амьсгалтай огтлолцож, хип хоп урлагийн хоёр туйл нэг тайзан дээр нэгдэнэ гэдэг урьд хожид байгаагүй үйл явдал юм.
IceTop-ийн шүтэн бишрэгчдийн хувьд энэ бол зөвхөн дуу, хэмнэл төдий зүйл биш — “IceTop”-оор амьсгалдаг бүхний хувьд түүхэн үдэш болно. Тэд “Шүтээн минь” нэртэй энэхүү тоглолтоор дамжуулан хөгжмийн хязгаарыг давж, дахин нэг шинэ оргилыг эзлэх гэж байна.
“Шүтээн минь” үргэлж хамтдаа.
