Netflix платформоос “Stranger Things” олон ангит киноны тав дахь бөгөөд эцсийн улирлын трэйлэрийг албан ёсоор цацлаа. Даффер ах дүү нарын зохиож найруулсан энэхүү шинэ бүлэг нь өмнөх үйл явдлуудын үргэлжлэл бөгөөд Макс комд орсон, Хоукинс хотыг Upside Down-той холбосон Векнагийн аймшигт довтолгооны дараах нөхцөл байдлыг харуулна. Трэйлэрийн төгсгөлд Векна дахин гарч ирэн, гол дүрийн баатруудын эсрэг эцсийн тулаанд нэгдэхээр зэхэж буй нь ил болно.
Албан ёсны товч агуулгад дурдсанаар Хоукинс хот хагаралд өртөж, хүнд гэмтэл авсан бөгөөд баатрууд Векнаг хайж, түүнийг зогсоох ганц зорилготойгоор дахин нэгдэнэ. Гэсэн ч Векна ор сураггүй болсон. Түүний байршил болон зорилго тодорхойгүй хэвээр байна. Цаашлаад Засгийн газар Хоукинсыг цэргийн хөл хорионд оруулж, болсон үйл явдлыг арван жилийн ойгоор халхлахыг зорьж байна. Уиллийн алга болох өдөр ойртож, танил боловч улам аймшигтай харанхуй аажмаар нөмөрч эхэлж байна. Энэ удаагийн аюул бол өмнө нь тулгарч байсан бүхнээс нь илүү хүчтэй бөгөөд үхлийн аюул дагуулсан юм.
Netflix мэдэгдэлдээ “Stranger Things” цувралын төгсгөлийн бүлэг гурван хэсэгт хуваагдан гарах бөгөөд эхний анги нь арван нэгдүгээр сарын 26-нд, хоёр дахь нь арван хоёрдугаар сарын 25-нд, сүүлийн анги нь арван хоёрдугаар сарын 31-нд олон нийтэд хүрэх болно гэж дурджээ. Бүх ангийг Pacific Time 17:00 цагаас үзэх боломжтой.
Тавдугаар улиралд өмнөх улирлуудад тоглож байсан гол дүрүүд дахин нэгдэж байгаа бөгөөд үүнд Жойс Байерсийн дүрд Вайнона Райдер, Жим Хопперийн дүрд Дэвид Харбор, Арван Нэгэний дүрд Милли Бобби Браун, Майк Уилерийн дүрд Финн Вольфхард, Дастин Хендерсоны дүрд Гэйтен Матараззо, Лукас Синклэрийн дүрд Калеб Маклафлин, Уилл Байерсийн дүрд Ноа Шнапп, Максийн дүрд Сэди Синк, Нэнси Уилерийн дүрд Наталия Дайер, Жонатан Байерсийн дүрд Чарли Хитон, Робин Баклигийн дүрд Майя Хоук, Векнагийн дүрд Жейми Кэмпбелл Бауэр нар тоглох болно.
Мөн шинэ улиралд шинэ дүрүүд нэмэгдсэн бөгөөд Холли Уиллерийн дүрд Нел Фишер, Дерек Тернброугийн дүрд Жэйк Коннелли, дэслэгч Акерсын дүрд Алекс Браукс нар тоглох юм. Үүнээс гадна “Терминатор” киноны алдарт жүжигчин Линда Хэмилтон нууцлаг дүрээр уг цувралд нэгдэхээр болжээ.
Netflix-ийн “Stranger Things 5” нь энэ алдарт цувралын сэтгэл хөдлөм, сүр хүчтэй төгсгөлийг харуулах бөгөөд үл мэдэгдэх, аюулт хүчний эсрэг баатруудын эцсийн тэмцлийг дүрсэлнэ.
Доорх холбоосоор албан ёсны трэйлэрийг үзэх боломжтой.
