Дэлхийн алдарт дуучин Тейлор Свифт “The Life of a Showgirl” нэртэй шинэ студийн цомгоо гаргах гэж буйгаа албан ёсоор зарлалаа. Түүний хэлснээр уг цомог нийт 12 дуу багтаах бөгөөд нэмэлт бүтээл оруулахгүй гэдгийг онцлов. Учир нь дуунуудын тоог өөрчлөх нь уран бүтээлийн цогц байдлыг алдагдуулах эрсдэлтэй гэж тэрээр тайлбарлажээ.
Продюсерууд ба уран бүтээлийн баг
Шинэ цомгийн ажил Тейлорын “Eras Tour” аялан тоглолтын үеэр хийгдсэн байна. Түүний өмнөх хит бүтээлүүд болох “Bad Blood”, “Shake It Off”-ыг хамтран продюсерлэж байсан Макс Мартин, Шеллбэк нар мөн оролцжээ. Цомгийн дүрслэлийн ажлыг дэлхийд нэртэй гэрэл зурагчид болох Мерт Алас, Маркус Пигготт нар гүйцэтгэж, дөрвөн өөр сэдэвтэй хавтас бүтээсэн байна.
Нэршлийн утга
“The Life of a Showgirl” нэрийг сонгохдоо дуучин өөрийн найз залуу, хөлбөмбөгчин Трэвис Келсигийн “Тейлор бол жинхэнэ шоу охин. Тэр аялан тоглолт хийж байхдаа ч цомгоо бичдэг” гэсэн үгнээс санаа авсан гэдгээ хуваалцжээ.
Нээлтийн өдөр
Цомгийн албан ёсны нээлт 2025 оны аравдугаар сарын 3-нд болохоор товлогдоод байна. Энэ нь түүний өмнөх “The Tortured Poets Department” цомгийн дараах 12 дахь студийн цомог болж байгаа юм.
Амжилтын товчоо
Өнөөдрийн байдлаар Тейлор Свифт Грэмми наадамд нийт 52 удаа нэр дэвшиж, 14 удаа хүртсэн амжилттай, үеийнхээ хамгийн нөлөө бүхий уран бүтээлчдийн нэг хэвээр байна.
