Монголын ардын урлагийн үнэт өвийг мөнхөлсөн нэгэн дурсгалтай өдөр өнөөдөр тохиолоо. Ардын жүжигчин Шарын Чимэдцэеэгийн шүлэг, Урлагийн гавьяат зүтгэлтэн Шинэбалжийн Батсайханы хөгжимтэй “Тэнгэр ээж минь өршөө” хэмээх дууны нэрэмжит “Тэнгэр ээж” гэрэлт хөшөөний нээлт албан ёсоор боллоо.
Сүхбаатар аймгийн нутагт сүндэрлэсэн уг гэрэлт хөшөөний нээлтийн арга хэмжээнд аймгийн удирдлагууд, орон нутгийн иргэд, урлаг соёлын төлөөлөгчид өргөнөөр оролцсон байна. Тодруулбал, Сүхбаатар аймгийн Засаг даргын орлогч Б.Батбаатар, Уулбаян сумын ерөнхий боловсролын сургуулийн сурагчид, Ардын жүжигчин Ш.Чимэдцэеэгийн төрөл садан, нутгийн иргэд оролцжээ.
Мөн энэхүү арга хэмжээнд Монгол Улсын Ардын жүжигчин Нэргүй, морин хуурч, Дарьганга сумын уугуул Ардын жүжигчин Ч.Батсайхан, Монгол Улсын гавьяат жүжигчин С.Сарантуяа, Г.Хонгорзул, Нансалмаа, Хорлоо, С.Цогтсайхан нарын зэрэг нэртэй уран бүтээлчид болон Дарьганга уртын дууны олон улсын наадамд оролцох уран бүтээлчид хүрэлцэн ирсэн юм.
Энэхүү гэрэлт хөшөө нь “Тэнгэр ээж минь өршөө” дуугаар дамжуулан эх дэлхий, тэнгэр хэмээх нандин ухагдахууныг хүндэтгэх сэтгэлийг уран сайхны уран бүтээлээр илэрхийлж, олон нийтэд хүргэх соёлын нэгэн бэлгэ тэмдэг болон сүндэрлэж байна.
1 comment
Соёлын өвийг ингэж хүндэтгэж байгаад талархаж байна, сайхан мэдээ байна