Цахим спорт ба экологи хосолсон санаачилга
Монголын цахим спортын “The MongolZ” баг байгаль орчны хамгааллын чиглэлээр томоохон санаачилга гаргаж, Дорноговь аймгийн Эрдэнэ сумын Ар цацын ус хэмээх газар 100 мянган хайлаас мод тарих төслийг хэрэгжүүлж байна. Тус баг “Шамбала Инженеринг Кампус” компанитай хамтран “The MongolZ #1” нэртэй төгөл байгуулах бөгөөд уг төгөл сансраас хүртэл харагдах хэмжээний нөлөө бүхий бүтээн байгуулалт болох юм.
Багийнхан өнгөрсөн дөрөвдүгээр сард уг санаачилгаа зарлаж байсан бол саяхан “Амлалтаа биелүүлэхээр зорьж байна, бэлтгэл ажил ид дундаа” хэмээн мэдэгдсэн байна.
Цөлжилтийн эсрэг Монголын залуусын хувь нэмэр
“The MongolZ” багийн төгөлд тарих тарваган хайлаас (Ulmus pumila) мод нь говийн эрс тэс уур амьсгалд тохирсон, 100–200 жил насалдаг, 8–12 метр өндөр ургадаг ургамал юм. Төслийн хүрээнд мод худалдан авсан хүн бүр өөрийн нэрийн модны гэрчилгээ, жил бүрийн ургалтын тайлан, зураг авах боломжтой бөгөөд арчилгаа, усалгаа, нөхөн тарилтыг таван жилийн турш мэргэжлийн баг хариуцах аж.
Энэхүү санаачилга нь цөлжилт, түйрэнгийн эсрэг тэмцэлд бодит хувь нэмэр оруулахаас гадна Монголын цахим спортын ертөнц байгаль хамгааллын шинэ чиг хандлагыг бий болгож буйг харуулж байна.
Одоогоор “The MongolZ” багийнхан Хятадын Чэндү хотод 11 дүгээр сарын 3–9-нд болох “IEM Chengdu 2025” тэмцээнд оролцохоор бэлтгэлээ базааж байна.
