Бээжин хотноо энэ долоо хоногт болсон дуудлага худалдаагаар хүнтэй ижил хэмжээтэй Labubu хүүхэлдэй 1.08 сая юаниар (ойролцоогоор 150,324 ам.доллар) зарагдлаа. Yongle International Auction дуудлага худалдааны компанийн мэдээлснээр энэ нь дэлхий дээрх хамгийн өндөр үнээр борлуулагдсан тоглоом боллоо.
Labubu хүүхэлдэйг 10 жилийн өмнө Хонконгийн уран бүтээлч Kasing Lung бүтээсэн ба сүүлийн жилүүдэд олны танил хүмүүс дэмжсэнээр дэлхий даяар нэрд гарчээ. Уг хүүхэлдэйг Pop Mart хэмээх Хятадын тоглоомын компани үйлдвэрлэдэг бөгөөд энгийн Labubu-гийн үнэ ердөө 50 юань (6.95 ам.доллар) байдаг.
Энэ удаагийн дуудлага худалдаа зөвхөн Labubu тоглоомуудад зориулагдсан бөгөөд:
- Нийт 48 төрлийн эд зүйлс худалдаанд гарсан
- Ойролцоогоор 200 хүн оролцсон
- Нийт 3.37 сая юанийн орлого олсон
Labubu тоглоом TikTok болон Инстаграм платформоор дамжин цахим орчинд тархсан бөгөөд K-pop хамтлаг Blackpink-ийн гишүүн Лисагийн олон нийтэд хандсан постууд энэ сонирхлыг өдөөжээ. Rihanna, Dua Lipa зэрэг алдартнууд ч мөн Labubu хүүхэлдэйг хэрэглэж буй зургаа нийтэлсэн бол Английн шигшээ багийн ахлагч асан Дэвид Бэкхэм цүнхэндээ Labubu зүүсэн зургаа оруулж байсан удаатай.
2024 оны эхээр Pop Mart компанийн тоглоомын дэлгүүрүүдэд худалдан авагчдын хооронд маргаан, зөрчил гарч байсан тул Их Британид бүх дэлгүүрээс Labubu-г татан авсан байна. Энэ тоглоомууд ихэвчлэн «сюрприз хайрцаг» буюу савыг задлах хүртэл яг ямар тоглоом байгааг мэдэхгүй байдлаар худалдаалагддаг нь сонирхол татах нэг хүчин зүйл юм.
Labubu-гийн амжилт Pop Mart компанийн орлогод шууд нөлөөлжээ. 2024 онд тус компанийн орлого 13 тэрбум юаньд хүрсэн нь өмнөх оныхоос хоёр дахин их үзүүлэлт юм. Түүнчлэн өнгөрсөн жил Итали, Испани зэрэг таван улсад шинэ дэлгүүр нээсэн байна.
