Монгол Улсын Ерөнхийлөгч Ухнаагийн Хүрэлсүх Үндэсний их баяр наадмыг нээж үг хэлэх үеэрээ монгол наадмын түүхэн ач холбогдлыг онцолж, тусгаар тогтнол, эв нэгдэл, төрт ёс, түүх соёлын чухал бэлгэдэл гэдгийг онцоллоо. Энэ жил Тулгар төрийн 2234, Их Монгол Улсын 819, тусгаар тогтнолоо сэргээн мандуулсны 114, Ардын хувьсгалын 104, Ардчилсан хувьсгалын 35 жилийн ой давхцаж буй онцгой жил тохиож байна.
Наадмын нээлтийн ёслолд төрийн айлчлалаар хүрэлцэн ирсэн Япон Улсын Эзэн Хаан Нарүхито, Хатан Масако нар хүндэт зочноор оролцсон нь Монгол, Японы найрсаг харилцааг илэрхийлж байна.
Ерөнхийлөгч хэлсэн үгэндээ Хүннү гүрнээс эхтэй монгол наадам нь монгол төрийн сүр жавхлант уламжлалт баяр, төрт ёсны соёлын өв хэмээн тодорхойлов. Тэрбээр:
“Монгол хүн, монгол морь амь нэгтэй” хэмээн ард түмний уламжлалт үнэт үзэлд тулгуурлан адууны соёлыг дэлхий дахинд сурталчлах зорилгоор санаачилсан “Дэлхийн адууны өдөр”-ийг НҮБ жил бүрийн долоодугаар сарын 11-нд тэмдэглэж байхаар шийдвэрлэснийг онцлон тэмдэглэлээ.
Мөн Ерөнхийлөгч Хүрэлсүх:
- Чингис хааны эш хөрөг, Алтан шүтээн, Төрийн хасбуу тамга, Их цагаан туг зэргийг хүндэтгэн залах ажлыг санаачилсан;
- Хархорум хотын сэргээн байгуулалтын ажил албан ёсоор эхэлснийг мэдэгдсэн;
- Морин хуурын өв соёлыг түгээн дэлгэрүүлэх, Монголын түүхийн 30 боть бүтээлийг гаргах зэргээр соёлын бодлогын томоохон алхмуудыг хэрэгжүүлж буйгаа дурдлаа.
Түүнчлэн:
“Монголчууд аугаа их хааныхаа сургаал, төрийнхөө уламжлалыг хүндэтгэн, хүчирхэг Монгол Улсыг хамтдаа бүтээх ёстой” хэмээн уриаллаа.
Наадмын нээлтийн үеэр уяачдын хүлэг морьд тал нутгийг донсолгож, бөхчүүд хүчээ сорин барилдаж, мэргэн харваачид цэц мэргэнээ гайхуулж байгааг Ерөнхийлөгч дурдаад:
“Мөнх тэнгэрийн хүчин дор Монгол Улс мандан бадрах болтугай” хэмээн үг хэлсэн юм.
