Улсын дуурь бүжгийн эрдмийн театрын уран бүтээлчид Д.Нацагдоржийн сонгодог бүтээл “Учиртай гурван толгой” дуурийг ирэх аравдугаар сарын 18-ны 17:00 цагт тайзнаа толилуулахаар товложээ.
Уран бүтээлийн баг
- Хөгжим: Төрийн шагналт, Ардын жүжигчин Б.Дамдинсүрэн, Б.Смирнов
- Цомнол: Д.Нацагдорж
- Найруулагч: Урлагийн гавьяат зүтгэлтэн Л.Эрдэнэбулган
- Ерөнхий зураач: Ардын зураач Ч.Гунгаасүх
- Туслах найруулагч: Б.Цэрэндаваа
Түүхэн замнал
Их Нацагдоржийн энэхүү бүтээл анх 1934 онд “Бөмбөгөр ногоон” театрт дуулалт жүжгийн хэлбэрээр тавигдсан бол:
- 1942 онд хөгжимт жүжиг,
- 1950 онд аялгуут жүжиг,
- 1976 онд бүрэн хэмжээний дуурийн хэлбэрээр үзэгчдийн хүртээл болсон юм.
Үндэсний сэтгэлгээ, хайр дурлалын мөн чанар, нийгмийн дүр төрхийг харуулсан энэ бүтээл бүх үеийн үзэгчдийн сэтгэлд хоногшсон билээ.
Өрнөл
Гурван бүлэг, таван үзэгдэлт энэхүү дуурь Юндэн, Нансалмаа, Балган, Хоролмаа нарын дундах хайр, атаархал, хувь тавиланг өгүүлнэ. Үйл явдлын гол тайз нь тал нутгийн гурван жижиг толгой бөгөөд энд хүний сэтгэл, хайр дурлалын түүхийг байгальтай нь хослуулан үзүүлдэг.
Эхний үзэгдэлд Юндэн, Нансалмаа хоёр одтой шөнийн нам гүнд учран “ижил хоёр шувуу мэт” хамт амьдрах мөрөөдлөө хуваалцана. Юндэн хуримын бэлтгэлээ базаахаар хот руу мордохдоо Нансалмаатай салах ёс хийдэг. Энэ үед тэдний хайранд атаархсан Хоролмаа хорон санаа сэдэж, үйл явдлын өрнөл улам сонирхолтой болох үндэс тавигддаг.
