Улсын драмын эрдмийн театр (УДЭТ) жүжгийн зохиолын улсын уралдаан зарлаж, жүжигчний шинэ үеийг бэлтгэх зорилгоор театрын дэргэдэх “Театр-Студи” ангид элсэлт авах гэж буй талаар албан ёсоор мэдээллээ. Элсэлтийн шалгалт энэ сарын 6-р сарын 18–19-нд УДЭТ-ын байранд зохион байгуулагдах бөгөөд мэргэжлийн жүжигчин болохыг зорьж буй залууст зориулсан энэхүү шалгаруулалт нь онцгой боломж болж байна.
Хэвлэлийн хурлын үеэр УДЭТ-ын уран сайхны удирдагч, соёлын тэргүүний ажилтан Б.Хишигзаяа, ерөнхий найруулагч, гавьяат зүтгэлтэн Ч.Түвшин, УДЭТ-ын зөвлөх Ч.Найдандорж болон бусад уран бүтээлчид оролцож, уг элсэлтийн болон уралдааны талаарх дэлгэрэнгүй мэдээллийг өгсөн юм.
Ч.Найдандорж жүжгийн зохиолын улсын уралдааныг түүхэн сэдэв, Аттила хааны тухай, хүүхдийн жүжиг болон орчин үеийн мюзикл гэсэн дөрвөн төрлөөр зарлаж буйг онцлон дурдсан бөгөөд уралдаан 8-р сарын 31-нийг хүртэл бүтээл хүлээн авна. Төрөл бүрт байр эзэлсэн бүтээлүүдэд 8–20 сая төгрөгийн шагнал олгох бөгөөд нийт шагналын сан нь 160 сая төгрөг байна. Шилдэг зохиолуудыг эмхэтгэн ном болгон гаргах ажил ч мөн төлөвлөгджээ.
Энэ үеэр “Театр-Студи” ангид элсэх хүсэлтэй хүмүүс жүжигчний мэргэжлээр бакалаврын зэрэгтэй байх шаардлагатай бөгөөд насны хязгаар тавиагүй байна. Шалгалт хоёр үе шаттай явагдах бөгөөд эхний шатанд биеийн хөдөлгөөн, бүжиг, дуу хоолой, уран уншлага, сонсгол ритмийн чадварыг шалгана. Ур чадварын шалгалтын талаарх дэлгэрэнгүй мэдээллийг УДЭТ-ын албан ёсны фэйсбүүк хуудаснаас авах боломжтой.
Мөн СУИС болон УДЭТ хамтран “Г.Доржсамбуугийн нэрэмжит жүжигчний анги”-ийн хөтөлбөрийг хэрэгжүүлж эхэлж буй талаар Б.Хишигзаяа танилцууллаа. Энэхүү хөтөлбөрөөр суралцагч УДЭТ-д мэргэжлийн хичээлүүдээ судалж, СУИС-д ерөнхий эрдмийн болон бусад хичээлээ үзэх юм. Уг ангид элсэхийн тулд монгол хэл, нийгэм судлалын хичээлээр ЭЕШ өгсөн байх шаардлагатай бөгөөд өмнөх онооны хүчинтэй хугацаа 2.8 жил тул зарим оюутан дахин шалгалт өгөхгүйгээр элсэх боломжтой аж.
Энэхүү хамтарсан хөтөлбөр нь төгсөгчдийг мэргэжлийн ажлын байранд шууд зуучлах боломжтойгоороо давуу талтай юм. Жүжигчний мэргэжлээр суралцах, урлагийн салбарт бие даан хөл тавих хүсэлтэй залууст зориулсан энэхүү боломжийг УДЭТ болон СУИС хамтран хэрэгжүүлж буй нь урлагийн салбарын ирээдүйд хүчтэй түлхэц өгөх хөтөлбөр болохыг зохион байгуулагчид онцоллоо.
