2025 оны долдугаар сарын 2-ны үдэш Чойжин ламын сүм музейд “Үдшийн музейд ятгач Г.Солонго” тоглолт болох гэж байна. Энэхүү тоглолт нь 2011 оноос хойш уламжлал болон зохион байгуулагдаж ирсэн “Үдшийн музей” хөтөлбөрийн хүрээнд зохион байгуулагдаж буй бөгөөд 19:00 цагаас эхэлнэ.
Тоглолтын гол оролцогч бол Үндэсний урлагийн их театрын гоцлол хөгжимчин, “Мөнгөн мод” шагналын эзэн, ятгач Г.Солонго юм. Тэрбээр 2023 онд шилдэг хөгжимчин, 2024 онд шилдэг цомгийн шагнал хүртэж, хөгжмийн урлагт өөрийн өнгө төрхийг бий болгосон авьяастан. Энэ удаа тэрбээр монгол ятгын аялгууг ардын хөгжмийн уянгатай, орчин үеийн электро, поп хөгжимтэй хослуулан тайзнаа амилуулах аж.
Г.Солонго бол Монголын үндэсний урлагийн их театрт ажилладаг олон уран бүтээлчдийн нэг. Урлагийн гэр бүлд өссөн тэрбээр Хөгжим бүжгийн коллежийг төгсөөд “Ханбогд” хамтлагийг байгуулан 30 гаруй улсаар аялан тоглосон туршлагатай. Өнгөрсөн жил “Dreaming” нэртэй ковер цомог гаргасан бол 2024 онд “Солонго” хэмээн нэрлэсэн анхны гоцлол хөгжмийн пянз цомгоо гаргаж, есөн бүтээлээ нийтэд хүргэсэн.
Гоцлол ятга хөгжим, уран бүтээлийн шинэчлэл, үндэсний болон орчин үеийн хөгжмийн төгс хослол бүхий уг тоглолт Үдшийн музейн онцлох арга хэмжээ болж байна.
