“Дэлхийн уран гулгалтын одод Монголд” нэртэй олон улсын шоу тоглолтын гурав дахь удаагийн арга хэмжээнд оролцох дэлхийн хэмжээний алдарт уран гулгагчид 2025 оны тавдугаар сарын 23-нд “Чингис хаан” олон улсын нисэх буудалд газардахаар болжээ.
Энэ удаагийн тоглолтод Олимпын медальтнууд, дэлхийн болон Европын аваргууд болох Евгения Медведева, Алексей Ягудин, Елизавета Туктамышева, Виктория Синицина, Никита Кацалапов, Александр Энберт зэрэг нэр хүндтэй уран гулгагчид оролцоно. Тэд “Степп Арена” мөсөн өргөөнд тавдугаар сарын 24, 25-ны өдрүүдэд шилдэг үзүүлбэрүүдээ толилуулах бөгөөд Монгол, ОХУ, Гүрж, Беларусийн залуу тамирчид ч мөн үзэгчдийг баясгах юм.
Шоуны хүрээнд урлаг спортын хослол бүхий тусгай үзүүлбэрүүдийг ч бэлджээ. “Никитон” хамтлагийн ахлагч Б.Батчулуун дэлхийн хоёр удаагийн аварга Евгения Медведеватай, “Номин талст” хамтлагийн дуучин А.Хаянхярваа алдарт хос уран гулгагчид болох Никита Кацалапов, Виктория Синицина нартай хамтран онцгой тоглолт үзүүлэхээр бэлтгэж байгаа аж.
Монголд уран гулгалт сүүлийн жилүүдэд эрчимтэй хөгжиж, мэргэжлийн түвшинд хичээллэж буй тамирчдын тоо нэмэгдэж байна. 2021 онд олон улсын стандартад нийцсэн мөсөн өргөө нээгдсэн нь энэ спортыг хөгжүүлэх боломжийг өргөжүүлсэн бол “Тал нутгийн мөсөн шоу” 2023 онд анх удаа зохион байгуулагдсан нь анхны алхам байв. Энэ жилийн тоглолтыг Монголын тэшүүрийн холбоо Японы тэшүүрийн холбоотой хамтран зохион байгуулж байгаа бөгөөд тасалбарыг Ticket.mn сайтаар худалдаалж байна.
