Скейтбордын соёлын бэлгэ тэмдэг болсон Vans брэнд АНУ-ын алдарт дуучин SZA-тай олон жилийн хамтын ажиллагааны гэрээ байгуулж, түүнийг брэндийн шинэ Artistic Director (бүтээлч удирдагч)-оор томилсноо зарлалаа. Тэрээр ирээдүйн кампанит ажлууд болон тусгай коллекцуудыг хамтран бүтээх юм.
SZA-гийн байр суурь
SZA өөрийн сэтгэгдлээ илэрхийлэхдээ:
“Би олон жилийн турш ‘Knu Skools’ болон Vans-ийн бусад загваруудыг өмсөж ирсэн. Vans үргэлж миний үнэт зүйлтэй нийцэх философитой байсаар ирсэн. Бүтээлч удирдагчийн хувьд миний зорилго бол баяр баясгалан, нийгэмлэг, бүтээлч байдал, загварын холбоог Vans-ийн загваруудаар дамжуулан илэрхийлэх” хэмээн ярьжээ.
Vans ба урлагийн ертөнц
Vans нь зөвхөн скейтбордын ертөнцийн нүүр царай байгаад зогсохгүй, хөгжмийн салбарт ч хүчтэй байр суурь эзэлсээр ирсэн брэнд. Харин SZA өмнө нь Crocs брэндтэй хамтран өвөрмөц коллекцуудыг гаргаж байсан туршлагатай уран бүтээлч юм.
Шинэ бүлгийн эхлэл
Энэхүү хамтын ажиллагаагаар Vans-ийн залуу, чөлөөт сэтгэлгээ болон SZA-гийн урлагийн өвөрмөц ертөнц огтлолцож, брэндийн “Off the Wall” философийн шинэ үеийг нээж байна.
