Жаред Лето дахин олон нийтийн анхаарлын төвд орж ирэх гэж байна. Тэрээр “Morbius” киногоороо 2022 онд сүүлийн удаа ийм төвшний хүлээлттэй нүүр тулсан билээ. Харин одоо Disney болон Amazon MGM-ийн хоёр том төсөл болох “Tron: Ares” болон “Masters of the Universe” киноны гол дүрүүдэд тоглох гэж буй энэ үед түүний нэр хүндийг хүчтэй сэвтээж болзошгүй хүчирхийллийн шинжтэй бэлгийн дуулиан ил болжээ.
Air Mail сайтад нийтлэгдсэн мэдээллээр, есөн эмэгтэй (тэдгээрийн олонх нь нэрээ нууцалсан) Летог 2000-аад оны дунд үеэс хойш насанд хүрээгүй байх үедээ анхаарлыг нь татсан, дарамталсан, зарим тохиолдолд өөрийгөө нүцгэн үзүүлсэн гэж мэдүүлжээ. Тэдний дунд 17 настай охины өмнө “өөрийн эрхтнээ ил гаргасан” гэх мэт ноцтой мэдэгдлүүд байгаа бөгөөд Лето үүнийг эрс үгүйсгэсэн.
Энэ бүх дуулиан “Tron” франчайзын залгамж хойчийг авч явах жүжигчний хувьд хүнд нөхцөл үүсгэж байгаа юм. Гэвч кино салбарынхан дотроо түүнд ямар нөлөө үзүүлэхийг харзнан ажиглаж байна. Disney өмнө нь Жонни Деппийн олон дуулиантай амжилттай нүүр тулж байсан туршлагатай ч Летогийн асуудлыг тэр түвшинд хүрээгүй гэж зарим эх сурвалж үзэж байгаа.
Эдгээр мэдэгдэл нь киноны зураг авалтын үеэр болоогүй, мөн одоогоор ямар ч эрүүгийн хэрэг үүсээгүй гэж “Tron” болон “Masters of the Universe” кинонуудтай ойр эх сурвалжууд онцолжээ. Гэсэн ч, олон нийтийн өмнө “хэлэлцэх ёстой” жүжигчний хувьд ийм ноцтой дуулиан нь сурталчилгаа, олон нийтийн харилцаанд томоохон сорилт болох нь гарцаагүй.
Лето одоогоор өөрийн хамтлаг “30 Seconds to Mars”-ынхоо аялан тоглолттой байгаа бөгөөд энэ зун дууссаны дараа “Tron: Ares” киноны 2025 оны 10-р сарын 10-ны нээлт рүү чиглэн, сурталчилгаанд оролцох ёстой. Энэ бол түүний хувьд эхний нэр дээр бичигдсэн гол дүрийн ховор боломжуудын нэг юм.
Иймэрхүү нөхцөлд студиуд болон жүжигчид хэрхэн хариу үйлдэл үзүүлэх вэ гэдэг нь өөр өөр. Жишээлбэл, жүжигчин Блэйк Лайвли энэ жил шүүхийн маргаантай ч нам гүмхэн гоёмсог даашинзтай зургаа авахуулсаар хэвлэлд гарч байсан бол, Шайа ЛаБаф Каннын кино наадамд өөрийн хар өнгийн өнгөрсөн амьдралтайгаа нүүр тулсан “Slauson Rec” баримтат киногоо дэмжин гарч ирсэн.
Салбарын нэгэн өндөр түвшний удирдлагын үзэж байгаагаар, одоогийн улс төр, нийгмийн нөхцөлд #MeToo хөдөлгөөн эрчээ алдсан нь Жаред Летогийн хувьд «зөөлөн буух» боломжийг олгож мэднэ гэжээ.
“Одоогийн улс төрийн уур амьсгалд Трампын тухай муу зүйл хэлсэн нь бүр их асуудал дагуулж мэдэхээр болсон цаг үе шүү дээ,” хэмээн тэр онцолсон байна.
