Дуучин Жесси урлагийн ертөнцөд эргэн ирэх болсноо албан ёсоор мэдэгдлээ. Тэрбээр шүтэн бишрэгч рүү халдсан хэрэгт нэр холбогдсоноос хойш найман сарын дараа шинэ уран бүтээлтэй болохоо зарлаж байгаа нь энэ юм.
Өчигдөр Жесси өөрийн цахим сувгуудаар нэгэн богино хэмжээний тизер бичлэг нийтэлсэн бөгөөд бичлэгт хуучин загварын зурагтны дэлгэц гарч, “JESSI 2025.06.27” гэсэн огноо бичигдсэн байв. Энэ нь түүний шинэ уран бүтээлийн гараа зургадугаар сарын 27-нд болохыг илтгэж байна.
Түүний эргэн ирэлт нь 2024 оны аравдугаар сард үүссэн маргааны дараах анхны уран бүтээл юм. Тухайн үед Сөүлийн Каннам дүүргийн Апгүжонгт Жессигийн шүтэн бишрэгч зураг авахыг хүссэн ч түүний ойрын хүн гэнэт халдсан хэрэг гарсан. Жесси тухайн үед богино хугацаанд оролцсон ч эцэст нь тухайн газрыг орхин явжээ.
Хохирогчийн зүгээс Жессигийн танилууд болон өөрийг нь оролцуулан нийт дөрвөн хүний эсрэг гомдол гаргасан байна. Цагдаагийн газраас Жессиг “сүрдүүлэлт, гэмт этгээдийг дэмжсэн” гэх үндэслэлээр байцаасан ч нотлох баримт хангалтгүй тул хэрэг үүсгэхээс татгалзсан байдаг.
Уг дуулианы дараа Жесси DOD агентлагтай байгуулсан гэрээгээ цуцалж, бүх уран бүтээлийн үйл ажиллагаагаа зогсоож байв. Тэрбээр нийтэд уучлал хүсэн хандсан ч олон нийтийн хандлага сөрөг хэвээр байлаа. Үүний дараа тэр гадаадад төвлөрөн ажиллаж байв.
Хэдийгээр шүүмжлэл дагуулсан явдал болсон ч олон шүтэн бишрэгч түүний эргэн ирэлтийг эерэгээр хүлээж авч буйгаа илэрхийлсээр байна. Сошиал сүлжээнд “Хатан хаан буцаж ирлээ”, “Бид чамайг их санасан” гэх мэт сэтгэгдэл олноор нийтлэгдэж байна.
