Монголын залуу авьяастан, жүжигчин Х.Сумъяадорж шинэ уран бүтээлээрээ үзэгчидтэй уулзах гэж байна. Тэрээр есдүгээр сарын 19-нөөс дэлгэцнээ гарах “ТАТАР” уран сайхны кинонд гол дүр бүтээж буй юм.
Уран бүтээлийн замнал
Х.Сумъяадорж өмнө нь “Хиртээгүй сарнай”, “Сорил”, “Эргэх учрал”, “Дайрлага”, “Өвлийн идэш”, “Хүлээх өрөө” зэрэг бүрэн хэмжээний кинонд тоглосон бол телевизийн олон ангит бүтээлүүдээс “Бүлэг”, “Бид нэг гэр бүл”, “Өв залгамжлагч”, “Амьдрах сайхан” зэрэг бүтээлүүдэд дүр бүтээсэн билээ.
Тайзны урлагт ч хүч үзэж, өнгөрсөн жил “Монгол” театрын тайзнаа “Клеопатра” жүжгийн Октавиан жанжны дүрийг амжилттай бүтээсэн. Мөн “Масктай Монгол” хошин шоу тоглолт, сүүлд “Мөрч” олон ангит кинонд оролцсоноор үзэгчдийн танил болсон.
“ТАТАР” киноны тухай
Шинэ бүтээл нь “Татар” хамтлагийн жинхэнэ түүхээс сэдэвлэсэн бөгөөд хамтлагийн уран бүтээлийн замнал, сорилт бэрхшээл, дотоод ертөнцийг өгүүлэхээр бүтээгджээ. Киног “Татар” хамтлаг, “Аранжин пикчерс”, “Promix sound”, “Red Point Media”, “SO Media” студи хамтран бүтээсэн бөгөөд зохиолыг А.Миеэгомбо, Т.Билгүүн, Л.Ариунболд нар бичиж, ерөнхий найруулагчаар Б.Батдэлгэр ажилласан байна.
Гол дүрүүд
- Жүжигчин, реппер Gangaa (Д.Ганбат)
- Жүжигчин Х.Сумъяадорж
- Н.Түвшин
- Б.Тэмүүжин
- Б.Балжинням
Кино үзэгчдэд зөвхөн хөгжмийн урлагийн тухай бус, уран бүтээлчдийн амьдрал, нөхөрлөл, тэмцлийн талаарх бодит түүхийг өгүүлэхээр онцлогтой.
