Ө.Мөнх-Эрдэнийн найруулсан, драм төрлийн “Хөх саран” уран сайхны кино одоо DDish, Looktv, Univision платформуудаар үзэгчдийн хүртээл болж байна. Киноны гол дүрийг “Тоонот” студийн уран бүтээлч, жүжигчин, дуучин Jason нэрээр танигдсан Б.Баяржавхлан бүтээсэн бөгөөд түүнтэй хамт Б.Ариунцэцэг, Б.Ариунчимэг, Ч.Ганбаатар нарын жүжигчид тогложээ.
Б.Баяржавхлан жүжигчин болох хүсэлтэй болсноо дунд сургуулийн сурагч байхдаа Дорноговь аймгийн “Саранхөхөө” театрт “Бөмбөлдэй баатрын домог” хүүхдийн жүжиг үзснээр олж мэджээ. Тэрбээр 2007 онд КУДС-д элсэн суралцаж, 2011 онд төгссөн байна. Төгссөн даруйдаа Улсын драмын эрдмийн театрт ажиллаж эхэлсэн бөгөөд тэнд таван жилийн хугацаанд “Гамлет”, “Тэнгэрийн хүү”, “Үгүйлэгдсэн хайр”, “Буруугүй буруутан”, “Уучлаарай, та дугаар андуурч”, “Өчигдөр” зэрэг жүжигт тоглосон. Мөн “Манекан” жүжигт туслах найруулагчаар ажиллаж байжээ.
Баяржавхлан кино урлагт анх долдугаар ангидаа хөл тавьж, “Хотын охид” уран сайхны кинонд тоглосон юм. Үүнээс хойш тэрбээр “Зэрлэг цэцэгсийн хүлэмж”, “Зүүдэнд ч оромгүй явдал”, “Өнөөдөр”, “Учрал”, “2000”, “Хүний цаана”, “Хиртээгүй сарнай”, “Дурсамж 2012”, “Сүүдрийн хот”, “Амьдралын урт замд”, “Чамтай учирснаас хойш”, “Зүрхэн зүг”, “Гүн тайгын манан” зэрэг олон бүрэн хэмжээний кинонд тогложээ. Түүнчлэн “Тэгри чину”, “Хавтаст хэрэг”, “Хавтаст хэрэг-2” зэрэг олон ангит кинонд оролцсон байна.
Jason буюу Б.Баяржавхлангийн хувьд “Хөх саран” кино нь түүний жүжигчний замнал дахь дараагийн онцлох алхам болж байгаа бөгөөд драм төрлийн энэ бүтээлээр дамжуулан үзэгчдэд өөр өнцгөөс хүрч буй уран бүтээл болж байна.
1 comment
Жэйсонд шинэ дүрд нь баяр хүргэе! “Цэнхэр сар” үзэх их сонирхолтой