Өмнөд Солонгосын нэрт жүжигчин Пак Сэ Жүн тархины хорт хавдартай хүүгийн амь насыг аврахад чухал хувь нэмэр оруулсан тухай мэдээлэл олон нийтийн сүлжээнд хуваалцагджээ. Тэрбээр хүүгийн өндөр өртөгтэй эмчилгээний зардлыг бүрэн дааж, гэр бүлд нь итгэл найдвар өгсөн байна.
Сэтгэл шимшрүүлэм захидал
Жүжигчин Пак өөрийн Instagram хуудсандаа хүүхдийн аав, ээжийн чин сэтгэлийн талархлын захидлыг нийтэлжээ. Захидалд өгүүлснээр хүү нь 2024 оны нэгдүгээр сард тархины хавдартай хэмээн оношлогдож, олон шат дараалсан эмчилгээ шаардлагатай болсон байна. Цусны улаан, цагаан эс болон ялтас үүсгэхэд чухал үүрэгтэй үүдэл эсийг шилжүүлэн суулгах мэс засал зайлшгүй хэрэгтэй байсан ч эмчилгээний зардал нь тэдний хувьд бараг боломжгүй түвшинд хүрч байв.
Пак Сэ Жүний өгсөн итгэл найдвар
Хүүгийн эцэг эх захидалдаа “Эмчилгээний зардлыг сонсоод бид бүх найдвараа алдаж байсан ч, жүжигчин Пак Сэ Жүн бидний хүүд амьдрал бэлэглэсэн. Бидний өмнөөс зардлыг бүрэн хариуцаж, хүүгийнхээ амийг аварсан хүн хэн бэ гэдгийг сонсоод бид нулимсаа барьж чадаагүй” хэмээн бичжээ.
Хүүтэй уулзах амлалт
Жүжигчин Пак Сэ Жүн хүү бүрэн эдгэрсний дараа заавал уулзана хэмээн амлалт өгсөн бөгөөд энэхүү үйлдэл нь түүнийг зөвхөн урлагийн чадвартай төдийгүй, өр зөөлөн сэтгэлтэй гэдгийг дахин баталж өгчээ.
