Буяны үйлсийг шинэ түвшинд хүргэж байна
Холливудын алдарт жүжигчин Жесси Айзенберг “Today” телевизийн нэвтрүүлэгт оролцох үеэрээ олон нийтийг гайхшруулсан мэдэгдэл хийлээ. Тэрээр энэ оны арванхоёрдугаар сарын дундуур нэг бөөрөө огт танихгүй хүнд хандивлахаар шийдсэн гэдгээ хэлжээ.
42 настай жүжигчин “The Social Network”, “Zombieland”, “Now You See Me” зэрэг киноны дүрээрээ дэлхий даяар танигдсан бөгөөд олон жилийн турш цусны донор байсан аж. Гэвч энэ удаа тэр буяны ажлаа илүү том алхмаар өргөжүүлэхээр шийдсэн байна.
Айзенберг хэлэхдээ:
“Тийм ээ, би нэг бөөрөө хандивлах гэж байна. Хүн нэг бөөртэй ч хэвийн амьдарч чадна. Цуснаас гадна би өөр юугаар тус болж болох вэ гэж удаан бодсон. Тиймээс хэнд ч мэдэгдэхгүйгээр хэрэгцээтэй хүндээ өгөхөөр шийдлээ. Бусдад тус болж байгаадаа үнэхээр баяртай байна” гэжээ.
Хандивын зарчим ба нийгмийн уриалга
АНУ-д эрхтэн хандивлах нь сайн дурын, үнэ төлбөргүй байдлаар явагддаг бөгөөд донор, хандив хүлээн авагч хоёрын хэн хэнд нь нэр, мэдээлэл ил болгодоггүй хатуу зарчимтай.
Жесси Айзенберг мөн:
“Бөөр хандивлах нь бараг эрсдэлгүй. АНУ-д одоогоор 90 мянга гаруй хүн бөөр шилжүүлэн суулгуулахыг хүлээж байна. Хэрвээ бид бүгд нэг нэгэндээ тусалж чадвал олон хүний амь аврагдана. Тиймээс хандив өгөхөөс бүү ай” хэмээн уриалжээ.
Бусдыг уриалсан сэтгэл хөдлөм алхам
Түүний энэхүү шийдвэрийг олон нийт, хандивын байгууллагууд өндрөөр үнэлж байна. Эрдэмтдийн тооцоолсноор, нэг донорын хандив 20-30 хүний амьдралыг шууд болон шууд бусаар аварч чаддаг гэж үздэг.
Жесси Айзенбергийн энэхүү алхам нь Холливудын оддын дундаас хувийн үлгэр жишээ үзүүлсэн хамгийн сэтгэл хөдөлгөм буяны үйлсийн нэг болж байна.
