2025 онд 301.7 сая ам.долларт хүрч, өмнөх оноос өсөв
Өмнөд Солонгосын к-поп цомгийн экспорт 2025 онд анх удаа 300 сая ам.долларын босгыг давсан нь 2026 оны 1-р сарын 16-нд нийтлэгдсэн гаалийн статистик мэдээллээр ил боллоо. Тус онд нийт 301.7 сая ам.долларын үнэтэй цомог гадаад зах зээлд экспортлогдсон нь өмнөх жилтэй харьцуулахад 3.4 хувийн өсөлт үзүүлжээ.
Япон хамгийн том худалдан авагч хэвээр, харин Хятад огцом нэмэгдэв
Экспортын үндсэн зах зээлүүдээс Япон улс хамгийн өндөр дүнгээр тэргүүлж, 80.6 сая ам.долларын к-поп цомог импортолсон байна. Хятадын импорт 69.7 сая ам.долларт хүрч, АНУ 64.0 сая ам.доллараар удаалжээ.
Энд нэг сонирхолтой өөрчлөлт ажиглагдав. Японы импорт өмнөх жилээс 10.2 хувиар буурсан бол Хятадынх 16.6 хувиар өссөнөөр Хятад улс 2022 оноос хойш алдсан дэд байр сууриа АНУ-аас буцаан авсан байна.
Топ импортлогчид тэлсэн ч ширхэгийн борлуулалт хоёр жил дараалан буурлаа
К-поп цомгийн гол импортлогчдын жагсаалтад Тайвань, Герман, Хонконг, Нидерланд, Канад, Франц, Польш зэрэг орнууд мөн багтсан талаар мэдээлжээ. Нийт экспортын орлого өссөн боловч борлуулалтын ширхэгийн тоо сүүлийн хоёр жил дараалан буурсан нь өөр чиг хандлагыг давхар харуулж байна.
“Circle Chart” хөгжмийн зах зээлийн судалгааны байгууллагын мэдээлснээр 2023 онд нийт 120 сая ширхэг цомог борлогдож байсан бол 2025 онд 93.5 сая ширхэг болж буурсан үзүүлэлт гарчээ. Энэ бууралтын гол хэсэг Өмнөд Солонгосын дотоодын зах зээлд төвлөрч байгаа гэж тэмдэглэсэн байна.
