260 мянган хүн цуглах төлөвтэй, хамгаалалтыг чангатгав
Өмнөд Солонгос BTS хамтлагийн Сөүл хотод зохион байгуулах үнэгүй тоглолтын өмнө аюулгүй байдлын арга хэмжээг эрчимжүүлж, терроризмын сэрэмжлүүлгийн түвшнийг нэмэгдүүллээ.
Тоглолт гуравдугаар сарын 21-нд Гванхвамүн талбайд болох бөгөөд ойролцоогоор 260 мянга гаруй хүн цуглах төлөвтэй байна. Гуравдугаар сарын 17-нд болсон Засгийн газрын хуралдааны үеэр Ерөнхийлөгч Ли Жэ Мён аюулгүй байдлыг нэн тэргүүнд тавихыг онцолжээ.
Тэрээр: “Энэ бол дэлхий даяар хүлээгдэж буй арга хэмжээ. Хамгийн чухал асуудал бол аюулгүй байдал” гэж мэдэгдсэн байна.
Үүний дагуу төв Сөүлд терроризмын сэрэмжлүүлгийн түвшнийг дөрвөн шатлалын хоёр дахь буюу “анхаарал” түвшинд хүргэж, цагдаа, онцгой байдал, холбогдох байгууллагуудын хяналтыг нэмэгдүүлжээ.
Аялал жуулчлал ба орон нутгийн хариу үйлдэл
Тоглолтыг аялал жуулчлалыг дэмжих боломж болгон ашиглаж, Өмнөд Солонгосын Аялал жуулчлалын байгууллага, Соёл, спорт, аялал жуулчлалын яам хамтран сурталчилгааны арга хэмжээнүүдийг эхлүүлжээ.
Гванхвамүн орчимд том дэлгэцүүд, мэдээллийн цэгүүд, BTS-ийн өнгө төрхөөр чимэглэсэн фан бүс байгуулж, гадаадын жуулчдад зориулсан үйлчилгээ үзүүлэхээр бэлтгэж байна.
Харин зарим бизнес эрхлэгчид хэт их хүн цуглахаас болгоомжилж байгаа бол нөгөө хэсэг нь зочдын урсгал нэмэгдэхийг эерэгээр үнэлж байна. Зарим иргэдийн хувьд хөдөлгөөний хязгаарлалт хүндрэл үүсгэж байгаа ч олон хүн энэ арга хэмжээг улсын нэр хүндэд чухал гэж үзэж байна.
