Солонгосын энтертайнмент ертөнцийн сүүлийн үеийн шуугианы эзэн болж буй модель Kim Go Eun Netflix-ийн нэрд гарсан болзооны реалити шоу “Single’s Inferno”-ийн тавдугаар улиралд оролцохоор болсныг олон эх сурвалж баталлаа.
2000 онд төрсөн Kim Go Eun нь БНСУ-ын хөлбөмбөгийн шигшээ багийн экс тоглогч Ким Хён Су-гийн охин бөгөөд “Мисс Кореа” тэмцээний шилдэг оролцогчдын нэгээр шалгарч байсан царайлаг модель юм. Тэрбээр миссийн тайзнаас гадна BIGBANG хамтлагийн од G-Dragon-той нэр холбогдсоноороо олны анхаарлыг татаад байсан. Тухайн үед G-Dragon-ы агентлаг тэднийг болздоггүй, зүгээр л дотно найзууд хэмээн үгүйсгэж байсан ч энэ цуурхал түүнийг олон нийтэд таниулах томоохон шалтгаан болсон билээ.
Netflix-ийн “Single’s Inferno” шоу нь романтик харилцаа, сэтгэл хөдлөл, өрсөлдөөнийг хослуулсан өвөрмөц форматаараа дэлхий дахины үзэгчдийг байлдан дагуулсаар ирсэн. Оролцогчид “Inferno” хэмээх алслагдсан арал дээр хамтдаа амьдарч, тэнд жинхэнэ холбоо үүсгэж чадсан хосууд л тансаг зэрэглэлийн “Paradise” руу шилжих эрхтэй болдог. Тус шоу Netflix-ийн гадаад хэл дээрх контентийн Глобал ТОП 10-д тогтмол бичигдэж, Солонгосын реалити шоуны хамгийн амжилттай төслүүдийн нэг болсон.
Тус шоуны тавдугаар улирал нь өмнөх улирлуудаа бодвол илүү олон танил оролцогч, илүү хурц өрнөлтэй байхаар хүлээгдэж байгаа бөгөөд Kim Go Eun-ы оролцоо шоуг илүү шуугиантай, сонирхолтой болгох нь дамжиггүй. Өмнөх улирлуудаас Song Zia, Cha Hyun Seung, Dex, Shin Seul Ki, Lee Kwan Hee зэрэг шинэ одууд төрөн гарч байсан нь тус реалити шоуг нэр алдар, олонд танигдах боломж болгодогийг баталж буй юм.
1 comment
Singles Inferno бүр л сонирхолтой болж байна шүү, шинэ улирал хүлээлт өндөр!