“Супермэн”, “Цөлийн хатан хаан Присцилла” зэрэг кинон дахь хорон санаат дүрээрээ үзэгчдэд танигдсан Британийн жүжигчин Теренс Стэм 87 насандаа таалал төгсжээ. Түүний гэр бүлээс энэ тухай Британийн хэвлэлүүдэд мэдээлсэн байна.
Гэр бүлийнхний мэдэгдэлд:
“Теренс Стэм жүжигчин, зохиолчийн хувьд олон арван жилийн турш уран бүтээлээрээ хүмүүст урам зориг өгч чадсан. Түүний өв урлагт мөнхөд хадгалагдана” гэжээ.
Урлагийн замнал
1960-аад оноос нэрд гарсан тэрээр Пьер Паоло Пасолинигийн “Теорем”, Жорж Лукасын “Оддын дайн” зэрэг бүтээлээр урлагийн тайзнаас Холливуд хүртэлх өргөн үзэгчдийг байлдан дагуулсан. Урт хугацааны уран бүтээлийнхээ явцад тэрээр 60 гаруй кинонд тогложээ.
1938 оны долдугаар сарын 22-нд Лондон хотод ажилчин айлд төрсөн Теренс Стэмийн карьер Марк Питер Устиновын найруулсан “Билли Бадд” киноны дүрээр эхэлсэн. Энэ бүтээлээрээ тэрээр “Оскар”-ын шагнал болон “Алтан бөмбөрцөг”-ийн шилдэг шинэ эрэгтэй жүжигчин номинацид нэр дэвшсэн юм.
Хожим тэрээр хорон санаат дүрээрээ олон улсын тавцанд алдаршиж, Уильям Уайлерын хайрын сэдэвт “Цуглуулагч” кинонд бүтээсэн дүрээрээ 1965 оны Каннын кино наадмын шилдэг эрэгтэй гол дүрийн шагнал хүртсэн байна.
