Эр-Рияд хотод болж буй Esports World Cup 2025 тэмцээн 1.2 сая ам.долларын шагналын сантайгаар эхэллээ. Дэлхийн шилдэг 16 баг өрсөлдөж буй тус тэмцээний эхний шатанд Монголын The MongolZ Германы GamerLegion-ийг 2:0-ээр илүүрхэн ялж, шөвгийн наймд шалгарлаа.
Өрсөлдөгчийн сонгосон Overpass map дээр манай баг хамгаалагч талаас тоглолтоо эхлүүлж, довтолгоонд шилжсэний дараа 13:7-ийн харьцаатай ялсан бол дараагийн Inferno map дээр бүр ч хүчтэй тоглон 13:3-аар ялалт байгуулсан юм. Тоглолтын шилдэг тоглогчоор ахлагч Blitz буюу Б.Гарьдмагнай тодорлоо.
Шөвгийн наймын тоглолтод The MongolZ маргааш шөнө Украины Natus Vincere болон Францын 3DMAX-ийн аль ялсантай нь тулна.
Тэмцээний ялагч баг 500 мянган ам.доллар хүртэх бол хоёрдугаар байр 230 мянга, гуравдугаар байр 130 мянган ам.долларын шагнал авах юм. Team Vitality, FaZe Clan, MOUZ, Team Spirit зэрэг дэлхийн шилдэг багууд ч энэхүү тэмцээнд өрсөлдөж байна.
