Дэлхийн кино урлагийн домогт жүжигчин, Оскарын шагналт Дайан Китон 79 насандаа таалал төгссөнийг түүний гэр бүлийн төлөөлөгч Бямба гарагт мэдээллээ.
Гэр бүлийнхний хүсэлтээр түүний нас баралтын талаар илүү дэлгэрэнгүй мэдээлэл өгөхөөс татгалзжээ.
Кино урлагийн алтан үеийн од
Дайан Китон нь “Загалмайлсан эцэг” (The Godfather) цуврал кинонд Кэй Адамс буюу Аль Пачиногийн бүтээсэн Майкл Корлеоны эхнэрийн дүрээр алдаршсан юм.
Мөн тэрээр найруулагч Вүүди Аллены “Annie Hall” (1977) инээдмийн кинонд бүтээсэн дүрээрээ Оскарын шилдэг эмэгтэй жүжигчний шагнал хүртэж, Холливудын түүхэнд өөрийн байр суурийг баталгаажуулсан билээ.
Китон Аллентай нийт найман кинонд хамтран ажилласан бөгөөд түүний урлагийн өв уламжлалд “Reds”, “Marvin’s Room”, “Something’s Gotta Give” зэрэг бүтээлүүд онцгой байр эзэлдэг.
Гурван ч удаа Оскарт нэр дэвшиж байв
Тэрээр BAFTA, Golden Globe шагналуудыг хүртэж байсан бөгөөд дээрх бүтээлүүдээрээ Оскарын шилдэг эмэгтэй жүжигчний шагналд гурван удаа нэр дэвшиж байжээ.
Сүүлийн жилүүдэд тэр өндөр настай эмэгтэйчүүдийн дүр бүтээсэн “Book Club” (2018), “Poms” (2019) зэрэг кинонд тоглож, үзэгчдийн сэтгэлийг дахин хөдөлгөсөн юм.
Хувийн амьдрал
1946 оны нэгдүгээр сарын 5-нд Лос Анжелес хотод төрсөн Дайан Китон кино урлагийн ертөнцөд эмэгтэйчүүдийн хүчирхэг дүрийг төлөөлж ирсэн.
Тэрээр найруулагч Вүүди Аллен, жүжигчин Аль Пачино, найруулагч Уоррен Битти зэрэг нэрт уран бүтээлчидтэй дотно харилцаатай байсан ч огт гэрлэж байгаагүй юм.
2019 онд өгсөн ярилцлагадаа тэрээр:
“Би гэрлээгүй, гэхдээ энэ талаар их боддоггүй. Магадгүй би нэг зүйлийг алдсан байх. Гэвч хэн ч амьдралаас бүх зүйлийг авч чаддаггүй”
хэмээн дурдсан байдаг.
Китон Декстер болон Дюк нэртэй хоёр хүүхдийн эх болж, амьдралынхаа сүүлийн жилүүдийг гэр бүлтэйгээ өнгөрүүлсэн билээ.
