Ромын Пап Лео XIV Ватиканд Холливудын нэртэй жүжигчид, найруулагчдыг урьж, урлаг, киноны ирээдүйн талаар нээлттэй ярилцсан уулзалт зохион байгууллаа. Кэйт Бланшетт, Моника Беллучи, Вигго Мортенсен зэрэг дэлхийн хэмжээний уран бүтээлчид түүний урилгыг хүлээн авч ирсэн нь Ватиканд анх удаа зохион байгуулагдсан ийм төрлийн уулзалтыг онцгой үйл явдал болгож байна.
Ватиканд Голливудынхан цугларсан түүхэн өдөр
Папаар сонгогдоод удаагүй байгаа Лео XIV-ийн хувьд энэ уулзалт нь урлаг, соёлын нөлөө бүхий төлөөллүүдтэй харилцаагаа гүнзгийрүүлэх анхны том алхмуудын нэг гэж Ройтерс агентлаг тэмдэглэв. Тэрээр кино театраар үйлчлүүлэх хүндрэл, үзэгчийн тоо буурч байгааг шууд хөндөн ярьж, үүнд санаа зовниж байгаагаа илэрхийлсэн нь кино салбарт үзүүлэх ёсгүйгээр том дэмжлэг гэж оролцогчид үнэлжээ.
Алдарт найруулагч Спайк Ли хожим нь энэ өдрийг “гайхалтай уулзалт болсон” хэмээн тодорхойлж, Ватиканд ийм уулзалт анх удаа болж буйг онцолж ярьсан байна. Тэрээр мөн Папын Америк гаралтайг бэлгэдэж, Нью-Йорк Никс багийн 14 дугаартай, “Pope Leo” гэж бичсэн сагсан бөмбөгийн хувцсыг бэлэг болгон барьжээ. Ингэснээр сүмийн протокол, спорт, киноны ертөнц нэг танхимд огтлолцсон өвөрмөц мөч бүрдсэн юм.
Уулзалтыг Ватиканы төв сүмийн Клементин танхимд зохион байгуулсан бөгөөд уран барилга, түүхэн орчин нь өөрөө киноны үзэгдэл мэт сэтгэгдэл төрүүлж байсан хэмээн оролцогчид дурссан байна.
Кино урлагийн нийгмийн үүргийн тухай Папын уриалга
Нээлтийн үг хэлэхдээ Пап Лео XIV кино урлагийн нийгэм, сэтгэл зүйд үзүүлэх нөлөөг онцлон магтаж, уран бүтээлчдийг хүнд сэдэв, иргэншлийн эмзэг асуудлаас зайлсхийхгүй байхыг хүссэн юм. Тэрээр кино нь зугаацуулж, боловсруулж, гайхшруулахын зэрэгцээ бодит амьдралын эмзэг сэдвийг шударгаар харуулах онцгой чадвартай гэдгийг тодорхой хэлжээ.
Түүний хэлсэн үгийг бүрэн эхээр нь эш татвал:
“Сайн кино хүмүүсийн зовлон зүдгүүрийг ашигладаггүй, харин таньж, ойлгож судалдаг. Агуу найруулагчид бүгд ийн ажиллаж ирсэн. Хүчирхийлэл, ядуурал, ганцаардал, донтолт, дайн тулаан цөм анхаарал хандуулж, урлагаар дамжуулан өгүүлэх шаардлагатай асуудлууд мөн. Түүнчлэн, олон хүн кино урлаг, кино театрт үйлчлүүлэх соёл устаж болзошгүйд санаа зовниж байна. Салбарынхан энэ хүнд хэцүү цаг үед бууж өгөлгүйгээр кино урлагийн нийгэм, соёлын үнэ цэнийг бататгахын төлөө хамтран ажиллах ёстой. ”
Эдгээр үг нь нэг талаар уран бүтээлчдэд хандан хэлсэн урлагаа битгий хялбаршуул, үзэгчдийн зовлон шаналлыг шоу болгож ашиглахаас сэрэмжил гэсэн сануулга шиг сонсогдож байсан бол нөгөө талаар кино театрын “соёл устаж магадгүй” гэсэн болгоомжлолыг ил гаргасан дохио байлаа.
Лео XIV – дотогшоо Папа юу, шинэ дүр төрх үү?
Кардиналуудын сонголтоор Лео XIV Папын суудалд заларснаас хойш зургаан сар өнгөрөөд байгаа ч зарим итгэгчид түүнийг өөрийн байр суурь, өнгө аяс, тэр дундаа олон нийтийн өмнөх харизмтай дүр төрхөө харуулахдаа удаан, болгоомжтой хандаж байна гэж шүүмжилж байв. Өмнөх Пап Фрэнсис илэн далангүй, шулуун яриа, хүний сэтгэлд ойр, харизмтай хэв маягаараа дэлхий даяар танигдсан бөгөөд олон нийттэй харилцахдаа тун идэвхтэй байснаараа онцгой ялгардаг байсан.
Харин Лео XIV анх сонгогдоход нь илүү дотогш, дөлгөөн, нам гүм зан чанартай гэж тодорхойлж байсан бол кино урлагийн төлөөлөлтэй хийсэн энэ уулзалт нь түүний шинэ дүр төрхийг харуулсан, илүү нээлттэй алхам болсон гэж ажиглагчид үзэж байна. Урлаг, киноны салбартай шууд ярилцаж, уран бүтээлчдийн ажлын утга учир, нийгмийн үүргийг дэмжиж буйгаа ийм тод мессежээр илэрхийлсэн нь Лео XIV-ийг зөвхөн сүмийн хүрээн доторх удирдагч бус, өргөн соёлын талбарт дуу хоолойгоо хүргэх сонирхолтой Пап гэдгийг харууллаа.
Шинэ Пап өнгөрсөн долоо хоногт өөрийн хамгийн дуртай дөрвөн киног зарласан нь мөн л кино сонирхолтой холбоотой дүр төрхийг нь тодруулсан үйл явдал болсон. Тэрээр Италийн найруулагч Роберто Бениний “Life is Beautiful” бүтээлийг онцолж, түүнчлэн 1960-аад оны сонгодог бүтээлүүд болох “The Sound of Music”, “It’s a Wonderful Life” зэрэг киног дурдсан нь хүний сайхан сэтгэл, найдвар, гэр бүлийн үнэ цэнэ, амьдралын гоо сайхныг харуулсан зохиолуудад онцгой ойр байдгийг нь илтгэж байна.
Ийнхүү Ватиканы Клементин танхимд болсон нэгэн уулзалт киног зөвхөн соёлын “зугаа” бус, хүмүүнлэг, нийгмийн гүн утга агуулгатай, хамгаалах ёстой урлагийн төрөл гэдгийг дахин сануулж, Пап Лео XIV-ийн шинэ өнгө төрх, шинэ мессежийг дэлхийд таниулсан өдөр болон үлдлээ.
