Диснейн түүх, сэдэвчилсэн паркуудын судалгаа, өдөр тутмын влогоороо танигдсан Америкийн YouTuber Адам Ву 51 насандаа нас барсан байна.
Гэртээ ухаангүй байдалтай олдож, нас барсныг газар дээр нь баталжээ
PEOPLE-ийн мэдээлснээр, Адам Ву (жинхэнэ нэр нь Дэвид Адам Уильямс) 12 дугаар сарын 22-нд Флорида мужийн Селебрейшн дэх гэртээ нас барсан байдалтай олдсон байна. Оцеола гүнлигийн шерифийн алба “Эрх баригчид гэрт нь ухаангүй эрэгтэй хүн байгаа тухай дуудлагад очиж, аврах багийнхантай хамт шалгасны дараа нас барсныг баталгаажуулсан” гэж PEOPLE-д мэдэгджээ.
Мөн эрх баригчдын мэдээлснээр, нэг танил нь гуравдугаар давхрын цонхоор дотор талыг шалгахын тулд шат зээлж, орон дээр ухаангүй хүнийг олсноор дуудлага өгсөн байна. Одоогоор гэмт хэргийн шинж тэмдэг илрээгүй бөгөөд нас баралтын шалтгааныг задлан шинжилгээгээр тогтооно гэжээ. Шерифийн алба талийгаачийн аавд мэдэгдэл хүргүүлсэн байна.
Найзууд нь “дэлхий аварга хүнээ алдлаа” гэж гашуудлаа илэрхийлэв
Мэдээлэл гарсны дараа түүний хамтран ажиллагчид, ойрын хүрээллийнхэн олон нийтийн сүлжээгээр эмгэнэл илэрхийлжээ. Дотны найз Жастин Скард “Би одоо юу ч хэлж чадахгүй зүрх сэтгэл минь шархалж байна. Дэлхий ертөнц аварга том хүнийг алдлаа, би цусан төрлөөсөө ч дотно ахаа алдлаа. Түүний эцэг эх, эгчийн төлөө залбираарай” гэж бичсэн бол өөр нэг найз Крис Ён “Бид ердөө дөрөв хоногийн өмнө хамтдаа цагийг өнгөрөөж, ирээдүйн контент төлөвлөгөө, аяллын талаар ярилцаж байсан. Үнэхээр итгэхэд бэрх юм” гэжээ.
“The Daily Woo” суваг, өдөр бүрийн влог, Диснейн судалгаагаар танигдсан нь
Адам Ву 2009 онд YouTube аяллаа эхлүүлж, 2012 онд үндсэн суваг болох “The Daily Woo”-г нээсэн байна. Тэр таван жилийн турш нэг ч өдөр алгасалгүй өдөр бүр влог нийтэлж, АНУ-ын 50 муж улсаар аялсан гэдгээрээ онцлог байв. Сэдэвчилсэн паркууд, хаягдсан хотууд, “сүнстэй” байшингууд, жижиг хотуудын амьдрал, түүхийг баримтат өнгө аясаар өгүүлдэг контент нь олон улсын үзэгчдэд танигдсан байна.
Тэр Диснейлэнд, Дисней Ворлдод тогтмол очиж, Уолт Диснейтэй холбоотой түүхэн байршлуудыг тайлбарлан хүргэдэг байсан тул олон дагагчийн дунд “Диснейн мэргэжилтэн” гэж нэрлэгддэг байжээ. Түүний сүүлийн бичлэг 12 дугаар сарын 21-нд нийтлэгдсэн бөгөөд баярын өдрүүдийн чимэглэлүүд гарсан байна.
Шүтэн бишрэгчдийн гашуудал үргэлжилж байна
Дэлхийн олон үзэгч түүнийг “аяллын утга учрыг мэдрүүлдэг бүтээгч”, “Диснейг хамгийн их хайрладаг түүхч” гэж нэрлэн, сошиал орчинд эмгэнэл илэрхийлсээр байна.
