Лаура Паузини олимпын нээлтийн ёслолд оролцохоор болжээ
Италийн нэрт дуучин, хөгжмийн зохиолч Лаура Паузиниг ирэх хоёрдугаар сард нээлтээ хийх “Милан-Кортина 2026” өвлийн олимпын наадмын нээлтийн ёслолд оролцоно гэж зохион байгуулагчид мэдээллээ.
Нээлтийн ёслол хаана, хэзээ болох вэ
“Милан-Кортина 2026” өвлийн олимпын наадмын нээлтийн ёслол хоёрдугаар сарын 6-нд Милан хотын Сан Сиро цэнгэлдэх хүрээлэнд зохион байгуулагдана. Ёслолын засал, найруулгыг “Balich Wonder Studio” хариуцах бөгөөд Америкийн поп од Мэрайя Кэри тэргүүтэй нэр алдартай уран бүтээлчид оролцохоор төлөвлөгдөж байна.
Дэлхийд танигдсан уран бүтээлчийн замнал
Урлагийн ертөнцөд олон улсын хэмжээнд хэдийнээ байр сууриа бататгасан Лаура Паузини 30 гаруй жилийн уран бүтээлийн хугацаандаа Грэммийн шагнал хүртэж, Оскарт нэр дэвшиж байсан туршлагатай.
“Seen” дуугаараа түүх бүтээсэн нь
Өдгөө 51 настай дуучин 2020 онд “Seen” дуугаараа Алтан бөмбөрцөг наадмын шилдэг дуу шагналыг хүртсэн. Ингэснээр тус наадмын шилдгээр шалгарсан итали хэл дээрх анхны дуу болж, онцлох амжилтад хүрчээ.
“The Life Ahead” кино, Оскарын нэр дэвшил
Швейцар найруулагч Эдоардо Понтигийн 2020 онд бүтээсэн “The Life Ahead” киноны албан ёсны дуу болсон “Seen” тухайн жилийн Оскарын шагналд нэр дэвшиж байв.
“Escucha” цомог болон Грэммийн амжилт
Тэрээр 2004 онд итали, испани хэл дээр гаргасан “Escucha” цомгийн испани хэл дээрх хувилбараараа 2006 оны Грэммийн наадмын шилдэг латин цомгийн шагналыг хүртсэн түүхтэй. Ингэснээр Лаура Паузини Грэмми хүртсэн анхны бөгөөд одоогоор цор ганц итали дуучин хэмээн онцлогдож байна.
