Тимоти Чаламет, Кайли Женнер сүйгийн ирмэг дээр үү?

“Нөхөр, эхнэр” гэж дууддаг болсон хос

Холливудын хамгийн их анхаарал татдаг хосуудын нэг Тимоти Чаламет, Кайли Женнер нарын харилцаа албан ёсны сүй, гэрлэлтийн шат руу дөхөж яваа гэх шинж тэмдгүүд ил тод болж эхэллээ.

Daily Mail сонин US Weekly-г эш татан мэдээлснээр, орон нутгийн цагаар нэгдүгээр сарын 29-нд “Шаламет, Женнер нар энэ жил сүй тавих асуудлаар нухацтай ярилцсан” гэжээ. Эх сурвалжуудын мэдээллээр, тэд одоо харилцаандаа маш тогтвортой байгаа бөгөөд Кайли Женнер найз нөхдийнхөө өмнө Тимоти Чаламетыг “нөхөр” гэж дуудах нь олширсон байна.

Нэгэн ойрын хүн “Кайли харилцаандаа гол байр суурь эзэлдэг, Тимоти үүндээ сэтгэл хангалуун байдаг. Тэдний зан араншин бие биеэ маш сайн нөхдөг” хэмээн дурдсан бол, өөр нэг эх сурвалж “Тэд үндсэндээ гэрлэсэн хосууд шиг амьдарч байна” гэж тодорхойлжээ.

Нэг гэрт амьдарч, хүүхдүүдтэй нь гэр бүл шиг болсон нь

Хосын харилцаа олон нийтэд ил болсон цагаас хойш нэгээс дээш жил Лос Анжелес хотод хамт амьдарч байгаа гэж мэдээлэгджээ. Тимоти Чаламет нь Кайли Женнерийн өмнөх найз залуу Травис Скоттоос төрсөн хүүхдүүд болох долоон настай Сторми, гурван настай Айр нартай чөлөөт цагаа хамт өнгөрөөж, “гэр бүлийн хүн” шиг оролцдог болсон байна.

Саяхан тэд гар гараасаа хөтлөлцөн хувийн онгоцоор аялж буйгаа харуулсан зураг, дүрс нийтэд цацагдаж, илт романтик уур амьсгал шүтэн бишрэгчдийн анхаарлыг татсан.

Кардашианы гэр бүлийн байр суурь

Кайли Женнерийн гэр бүлийнхэн энэ харилцааг дулаан хүлээж авч буйг ч илэрхийлжээ. “Хлое гайхамшгийн оронд” подкастын сүүлийн дугаарт Ким болон Хлое Кардашиан нар Тимоти Чаламет Малибуд болсон гэр бүлийн уулзалтад оролцсон тухай дурсахдаа “Тэд бүх хугацаанд хамт байсан”, “Тэд үнэхээр аз жаргалтай харагдаж байсан” хэмээн ярьсан байна.

Хлое түүнийг “Тимми” гэж дотно дуудах болж, гэр бүлийн хүрээнд хүлээн зөвшөөрөгдсөн, дотно харилцаа үүссэн нь ил болжээ.

Олон нийтийн өмнөх хайрын илэрхийлэл

Тимоти Чаламет Кайли Женнертэй хайр дурлалт харилцаанд байгаагаа нуухаа больсон. Алтан бөмбөрцөг болон Critics’ Choice Awards зэрэг томоохон шагнал гардуулах ёслолын үеэр тэр Кайлиг “миний хамтрагч” хэмээн олон нийтийн өмнө хэлж, хажууд нь байсан Женнер “Би ч бас чамд хайртай” хэмээн амандаа шивнэсний дараа хоёр багахан үнсэлцэж, камерын анхаарлыг татсан.

Эдгээр мөчүүд нь “тэдний харилцаа зүгээр нэг болзоо биш, илүү гүн холбоо болжээ” гэсэн таамаглалыг улам хүчтэй болгож байна.

“Тайвширсан” цуурхлаас “сүй тавих” яриа хүртэл

Өнгөрсөн оны сүүлээр хос хоёрын харилцаа “тайвширч”, холдож магадгүй болсон гэсэн цуурхал гарах үед олон нийт салалтын тухай ярьж эхэлж байсан. Гэвч сүүлийн саруудад ил болсон мэдээлэл, хамтдаа аялж буй нь, гэр бүлийн эвентүүдэд зэрэгцэн сууж харагдаж буй нь уг цуурхлыг үндэслэлгүй болгожээ.

2023 оны дөрөвдүгээр сард харилцаа нь олонд ил болсноос хойш тэд олон нийтийн өмнө хамт гарах давтамжаа анхандаа багасгасан ч, одоо аажмаар илүү нээлттэй болж, “дараагийн алхам”-даа бэлдэж байгаа мэт дүр зураг ажиглагдаж байна.

Албан ёсны хурим, сүй тавих огноо, тов тодорхой болоогүй ч, “үйл явц аль хэдийн дотроо шийдэгдсэн, цаг хугацааны л асуудал үлдсэн” гэх өнгө аястай мэдээлэл олширсоор байна. Тиймээс Холливудын анхаарал одоо Тимоти Чаламет, Кайли Женнер хоёрын дараагийн нүүдэлд төвлөрч байна.