Цуурхлаас албан ёсны зар болтлоо: Жонгүг Hublot-ын дэлхийн амбассадор
Олон долоо хоног үргэлжилсэн цуурхал эцэстээ батлагдаж, тансаг зэрэглэлийн швейцарь цаг үйлдвэрлэгч Hublot BTS хамтлагийн гишүүн Жонгүгийг дэлхийн брэндийн амбассадороороо албан ёсоор зарлалаа.
2-р сарын 12-нд Hublot өөрийн нийгмийн сүлжээний албан ёсны сувгууд дээр шинэ нүүр царайгаа танилцуулж, Жонгүг брэндийн дэлхийн амбассадорын багт нэгдэж, Новак Жокович, Килиан Мбаппе, Усэйн Болт зэрэг домогт тамирчдын эгнээнд орж буйг мэдэгдэв.
Мэдэгдэлдээ тэд:
“Бид Hublot гэр бүлд Жонгүгийг шинэ дэлхийн брэндийн амбассадороор томилсондоо баяртай байна.
Бүтээлч байдал, нарийвчлал, өвөрмөц байдлын нийтлэг алсын хараа. Хөгжим болон өндөр зэрэглэлийн цаг үйлдвэрлэлийн нэгдэл.”
хэмээн онцолсон нь K-pop супер од, тансаг цагны ертөнцийг нэг шугамд авчирсан стратегийн хамтын ажиллагааны эхлэлийг илтгэж байна.
Албан ёсны зарын хамт Жонгүг өөрийн стилийг тодотгосон алтан шаргал детальтай хар өнгийн Hublot цаг зүүсэн шинэхэн сурталчилгааны зургууд нийтлэгдэж, фенүүдийн дунд халуун сэдэв болов. Зураг дээрх минимал, цэвэрхэн имиж нь брэндийн хүчтэй, дэгжин дизайныг уран бүтээлчийн тайван, өөртөө итгэлтэй төрхтэй төгс уялдуулжээ.
Видеоны концепц: нэг цаг, олон дүр төрх, “агшин бүр зорилготой”
Албан ёсны мэдэгдлийн дараа Hublot Жонгүгийн оролцсон сурталчилгааны шинэ видеог цацсан бөгөөд тэнд уран бүтээлчин дэгжин хослолтой төрхөөс өдөр тутмын илүү энгийн хэв маяг руу шилжин өөрчлөгдөх дүрсээр нэг загварын цагийг хэрхэн олон янзын стилтэй зохицуулж болдгийг харуулсан байдаг.
Видеоны тайлбарт:
“Агшин мөч бүр зорилготой ирдэг. Цаг хугацаагаар биш, харин түүнийг эзэмших замаар тодорхойлогддог. Жонгүг нарийвчлалтай урсах, хэмнэлээс хүч чадал олох, хяналтаас дэгжин байдлыг олж буйг илэрхийлдэг. Hublot-той хамт аялал хэрхэн өрнөхийг хараарай.”
хэмээн бичсэн нь Жонгүгийн тайзан дээрх хэмнэл, хөдөлмөрч чанар, нарийн мэдрэмжийг Hublot-ын цаг үйлдвэрлэлийн философитой холбосон мессеж болж байна.
Ийнхүү Hublot өмнө нь тамирчид давамгайлж байсан дэлхийн амбассадорын нүүр царайдаа K-pop-ийн нөлөө бүхий төлөөлөгчийг нэмж, спортын домгуудын хажууд дэлхийн хөгжмийн супер одыг байршуулснаар брэндийнхээ хүрээг шинэ түвшинд гаргалаа. Жонгүгийн хувьд энэ нь тансаг брэндийн албан ёсны дэлхийн амбассадор болсон томоохон карьерын шинэ бүлэг бөгөөд цаашдын хамтарсан кампани, тусгай коллекц, шинэ төслүүдэд тавигдах хүлээлтийг эрс нэмэгдүүлж байна.
