Өмнө нь хар тамхитай холбоотой хэргээр ял шийтгэлтэй байсан тэр дахин хууль зөрчсөн нь шүүхийн шийдвэрт нөлөөлөв
WINNER хамтлагийн гишүүн асан Nam Taehyun согтуугаар тээврийн хэрэгсэл жолоодсон хэргээр нэг жилийн хорих ял сонсож, энэ шийдвэр нь фенүүд болон энтертайнмент салбарынхны анхаарлыг татлаа.
Дөрөвдүгээр сарын 9-нд Сөүлийн Баруун дүүргийн шүүхийн Эрүүгийн хэргийн 11 дүгээр танхим түүнийг Замын хөдөлгөөний тухай хууль зөрчсөн буюу согтуугаар жолоо барьсан хэрэг болон холбогдох зүйл ангиудаар шүүх хурлыг хийжээ.
Шүүхээс Nam Taehyun-д нэг жилийн хорих ял, мөн нэг сая воны торгууль ногдуулсан байна.
Шүүхийн зүгээс яллагдагч өөрийн бурууг хүлээн зөвшөөрч, гэмшиж буйгаа илэрхийлснийг харгалзан үзсэн ч хэргийн ноцтой байдлыг онцолжээ. Шүүхийн тайлбарт, “Яллагдагч өмнө нь согтуугаар жолоо барьсан хэрэгт торгууль хүлээж байсан атлаа дахин ижил төрлийн хэрэг үйлдсэн. Түүнчлэн батлагдсан хар тамхитай холбоотой хэргийн дараах туршилтын хугацаандаа энэ гэмт хэргийг үйлдсэн нь хатуу шийтгэл оногдуулах үндэслэл болж байна” хэмээн дурдсан байна.
182 км/ц хурдтай явж байгаад замын тусгаарлагч мөргөсөн осол нь ялыг улам хүндрүүлжээ
Nam Taehyun өнгөрсөн оны дөрөвдүгээр сарын 27-ны өглөөний 04:10 цагийн орчимд осол гаргасан хэрэгт буруутгагдсан юм. Тэр Ганбёнбук-ро замаар Илсан чиглэлд, Дунжак гүүрний орчимд согтууруулах ундаа хэрэглэсэн үедээ автомашин жолоодож явахдаа өөр нэг машиныг гүйцэж түрүүлэхийг оролдон төвийн тусгаарлагч мөргөсөн байна.
Мэдээллээр түүний жолоодож байсан хурд 182 км/ц хүрсэн нь тухайн замын зөвшөөрөгдсөн 80 км/ц хурдны дээд хязгаараас үлэмж давсан үзүүлэлт байжээ.
Аз болоход уг ослоос хүний биед гэмтэл учраагүй ч тухайн үед Nam Taehyun-ий цусан дахь согтууруулах ундааны хэмжээ 0.122 хувь байсан нь жолооны үнэмлэхийг шууд хураах босго болох 0.08 хувиас хавьгүй өндөр байсан байна.
Өмнө нь гуравдугаар сарын 12-нд болсон эцсийн сонсголын үеэр прокурорууд түүнд нэг жил зургаан сарын хорих ял, нэг сая воны торгууль оногдуулах санал гаргасан байв. Тэд энэ шаардлагадаа түүний өмнөх ижил төрлийн зөрчил, цусан дахь согтууруулах ундааны өндөр агууламж, хурд хэтрүүлсэн ноцтой байдал, мөн туршилтын хугацаандаа дахин хэрэг үйлдсэн нөхцөлийг гол үндэслэл болгосон байна.
