Лиза Nike-ийн “дэлхийн царай” болж, карьерынхаа шинэ шатыг нээлээ
BLACKPINK хамтлагийн гишүүн Лиза 2026 оны 1-р сарын 20-нд зарласан урт хугацааны стратегийн түншлэлийн хүрээнд албан ёсоор Nike брэндийн дэлхийн элчээр томилогдлоо.
Энэхүү хамтын ажиллагаа нь түүний загвар, брэндийн салбар дахь карьерын хувьд томоохон эргэлтийн цэг болж, дэлхий даяарх Nike-ийн кампанит ажлуудаар дамжуулан Лиза өөрийн хувийн түүх, өсөлт, бүжгийн амьдралаа спортын хувцасны домогт брэндтэй холбох боломж нээгдэж байна.
Лиза өмнө нь Тайландын амны хөндийн арчилгааны Dentiste брэндийн элчээр ажиллаж байсан бөгөөд түүнээс гадна Celine, Bulgari, Louis Vuitton зэрэг өндөр зэрэглэлийн тансаг брэндүүдтэй хамтарсан төслүүдээрээ нэрд гарсан. Харин энэ удаагийн түншлэл нь масс зах зээл, гудамжны соёл, спортын ертөнцтэй огтлолцсон илүү өргөн хүрээтэй алхам болж байна.
Nike албан мэдэгдэлдээ Лизагийн нөлөө, танигдах байдлыг онцлон “дэлхий даяар нэр хүндтэй хүн цөөхөн байдаг. Nike-д тавтай морил, LISA” хэмээн баяртайгаар угтаж, энэхүү түншлэлийн цар хүрээг тодорхойлов.
Air Max 95, Pink Foam, Парис дахь зураг авалт: кампанит ажлын эхний дохио
Шинэ хамтын ажиллагааны эхний кампанит зургийг Парис хотод авчээ. Зураг дээр Лиза Nike Air Max 95 пүүз өмссөн бөгөөд гудамжны соёл, урлагийн дүр төрхийг хослуулсан стилистик шийдлээрээ анхаарал татаж байна. Air Max 95 загвар өөрөө олон жилийн турш гудамжны хэв маяг, sneaker соёлын салшгүй хэсэг байсаар ирсэн бол Лизагийн хувьд энэ нь өөрийн хувийн стилл, хөдөлгөөнтэй амьдралын хэмнэлийг илэрхийлэх хэрэгсэл болон харагдаж байна.
Зарлалын зурагт Лиса удахгүй дахин худалдаанд гарах Nike Air Max 95 “Pink Foam” загварыг сонгосон байгаа нь sneaker сонирхогчдын дунд ч тусгай анхаарал татаж байгаа юм.
“Rockstar” хамтлагийн дуучин Nike нь BLACKPINK-тэй дебют хийхээс ч өмнө, дадлагажигч байх үеэс нь амьдралынх нь нэг хэсэг байсан гэдгийг онцолжээ. Тэрээр бүжгийн бэлтгэлийнхээ үеэр Nike пүүз өмсөхийг мөрөөддөг байсан тухайгаа, мөн түүнд хүрэхийн тулд өөрөө мөнгө цуглуулж байсан тухайгаа хуваалцсан.
“Би бэлтгэлдээ зориулж Nike Dunk Highs пүүз худалдаж авахын тулд мөнгөө хадгалж байснаа санаж байна. Би маш бага байсан тул тэр мөч болон тэр гутал миний хамгийн тод Nike дурсамжуудын нэг хэвээр үлдэх болно.” хэмээх түүний дурсамж нь энэхүү түншлэл зөвхөн сурталчилгааны гэрээ биш, олон жилийн мөрөөдөл биелж буй мөч гэдгийг харуулж байна.
Спорт, загвар, эмэгтэйчүүдийн урам зориг: түншлэлийн гол чиглэл
Урт хугацааны энэ түншлэлийн хүрээнд Лиза Nike-ийн дэлхийн хэмжээний сурталчилгааны кампанит ажил, storytelling төсөл, урам зориг түгээх мессежүүдэд гол байр суурь эзлэх болно. Ялангуяа спорт болон загвараар дамжуулан эмэгтэйчүүд, охидыг өөртөө итгэлтэй байхад уриалах, бие хөдөлгөөн, бүжиг, фитнест хандах хандлагыг илүү эерэг, эрч хүчтэй болгохыг зорьж байгаа аж.
Лиза өөрөө олон жилийн турш бэлтгэл, тайзны амьдралаараа дамжуулан сахилга бат, хөдөлмөр, өөрийгөө дайчлахын бэлгэ тэмдэг болж ирсэн тул Nike-ийн “Just Do It” философитой органик байдлаар нийцэж байгаа гэж салбарын ажиглагчид дүгнэж байна.
BLACKPINK-ийн ирэх алхам: Deadline World Tour ба шинэ мини цомог
Nike-тай шинэ түншлэл зарлагдаж байх энэ үед Лиза урлагийн фронт дээр ч завгүй байна. Тайландын супер од тэрээр 2026 оны 1-р сарын 26-нд Хонконг хотод BLACKPINK хамтлагийн Deadline World Tour аялан тоглолтыг албан ёсоор өндөрлүүлэхээр төлөвлөсөн.
Үүний дараа BLACKPINK дөрвөл “Born Pink” цомгоос хойш бараг гурван жилийн турш хүлээлт үүсгээд байсан анхны бичлэгийн төслөө гаргана. Тэд 2026 оны 2-р сарын 27-нд “Deadline” нэртэй, таван дуутай мини цомог танилцуулахаар төлөвлөж байгаа нь уран бүтээлийн шинэ эрин эхлэх дохио гэж үзэж байна.
Ийнхүү Лиза нэг талаас дэлхийн спортын хамгийн том брэндийн нэгтэй урт хугацааны түншлэл эхлүүлж, нөгөө талаас BLACKPINK-ийн дараагийн хөгжмийн бүлгийг нээхэд гол үүрэг гүйцэтгэж, поп соёл, загвар, спортын огтлолцолд байрлах гүүр болсон хэвээр байна.
