G-Dragon-ы харьяалагддаг Galaxy Corp агентлаг энэ оны сүүлээр Сөүл хотод робот технологи, K-pop энтертайнментыг нэг дор хослуулсан шинэ парк нээхээр төлөвлөж байна.
K-pop ба робот технологийг хослуулсан шинэ парк
Galaxy Corp агентлаг Сөүл хотод робот сэдэвтэй энтертайнмент парк байгуулахаар ажиллаж байгаагаа мэдэгджээ. Тус парк нь K-pop соёл, орчин үеийн робот технологийг хослуулсан цогцолбор байх юм.
Шинэ парк Сөүлийн зүүн хэсэгт байрлах бөгөөд нийт 16,500 ам метр талбайг хамрах ажээ. Энд хүүхдүүдэд зориулсан интерактив хөтөлбөрүүд, үзвэрийн хэсгүүд болон роботын тоглолт зохион байгуулах концертын танхим багтах юм байна.
Роботууд K-pop уран бүтээлчдийн бүжгийг сурна
Тус паркийн нэг гол онцлог нь K-pop бүжиглэдэг роботууд байх аж. Роботууд motion-capture технологийн тусламжтайгаар K-pop уран бүтээлчдийн хөдөлгөөн, бүжгийн хэв маягийг сурах юм байна.
Ингэснээр үзэгчид роботын гүйцэтгэлтэй K-pop тоглолт үзэх боломжтой болох бөгөөд энэ нь хөгжмийн шоу, технологийн үзүүлбэр, гэр бүлийн энтертайнментыг нэг дор нэгтгэсэн шинэ хэлбэрийн үйлчилгээ болох төлөвтэй байна.
Парк наймдугаар сард албан ёсоор нээгдэнэ
Уг цогцолбор энэ сарын эхээр хязгаарлагдмал тооны зочдод хэсэгчлэн нээгдсэн байна. Харин олон нийтэд зориулсан албан ёсны нээлт нь наймдугаар сард болохоор төлөвлөгджээ.
Galaxy Corp-ийн тооцоолсноор нэг хүн тус паркаар бүрэн үйлчлүүлэхэд ойролцоогоор 3-4 цаг шаардагдах ажээ.
Жилд 1000 гаруй робот шоу зохион байгуулахаар төлөвлөжээ
Цаашид тус агентлаг жил бүр 1000-аас олон K-pop роботын шоу зохион байгуулахаар төлөвлөж байна. Энэ нь Сөүлийн аялал жуулчлал, K-pop сонирхогчдын шинэ үзвэрийн чиглэл болох боломжтой гэж үзэж байна.
Роботын тоглолт, хүүхдэд зориулсан хөтөлбөр, интерактив технологийн туршлага зэрэг нь паркийг зөвхөн фенүүдэд бус, гэр бүлээрээ очих энтертайнмент төв болгох зорилготой ажээ.
Galaxy Corp-ийн өргөжиж буй энтертайнмент бизнес
Galaxy Corp агентлаг 2019 онд байгуулагдсан. Тус агентлагт G-Dragon, Taemin зэрэг уран бүтээлчид харьяалагддаг.
Мөн Galaxy Corp нь дэлхий дахинд анхаарал татсан “Physical: 100” цувралыг продюсерлэсэн компани юм. Харин энэ удаагийн K-pop роботын парк нь тус агентлагийн технологи, урлаг, энтертайнментыг нэгтгэх шинэ томоохон төсөл болж байна.
