Эскалатор дээр тэнцвэрээ алдаж унасан байна
Дуучин Soyou шинэ клипний зураг авалтын үеэр унаж гэмтэн, яаралтай тусламжийн тасагт хүргэгдсэн тухайгаа дэлгэжээ.
Тавдугаар сарын 11-нд түүний “Soyougi” YouTube сувагт “Going to the ER While Filming a Music Video… | [Off Hours] Behind” нэртэй бичлэг нийтлэгдсэн байна.
Бичлэгт Soyou шинэ дууныхаа клипний бэлтгэлийн үеэр гэнэтийн осолд орсон мөчийг харуулжээ. Тэрээр метроны буудалд зураг авалт хийж байхдаа эскалатор дээр тэнцвэрээ алдаж унасан бөгөөд дараа нь эмнэлгийн яаралтай тусламжид хүргэгдсэн байна.
Даралт нь огцом унажээ
Ослын дараа продакшны баг яаралтай хуралдаж, метроны буудлын хэсгийг бүр мөсөн хасах талаар ярилцжээ. Гэвч Soyou ердөө хоёр цагийн дараа зураг авалтын талбайд буцаж ирсэн байна.
Soyou “Зүгээр л хөхөрсөн. Тэр мөчид би орилсон эсэхээ ч санахгүй байна. Яаралтай тусламжид очиход даралт маань маш бага байсан. Би маш их цочирдсон болохоор тод санахгүй байна. Гэхдээ өвдөж байсан ч ‘Метроны хэсгийг ямар нэгэн байдлаар заавал авах хэрэгтэй’ гэж хэлсээр байсан” гэж ярьжээ.
CT шинжилгээний хариугаа хүлээлгүй буцжээ
Тэрээр эмнэлэгт CT шинжилгээний хариугаа хүлээх ёстой байсан ч зураг авалтаа үргэлжлүүлэхээр шийдсэн байна.
Soyou “Уг нь CT шинжилгээний хариугаа хүлээх ёстой байсан. Гэхдээ би ‘Үгүй ээ, зүгээр. Би явъя’ гэж хэлээд гарсан” хэмээн тайлбарлажээ.
Энэ нь түүний уран бүтээлдээ хандах хариуцлага, мэргэжлийн хандлагыг харуулсан гэж фенүүд үзэж байна.
“Өвдөхгүй байна” гэж өөртөө хэлж байжээ
Зураг авалтын баг түүнээс үлдсэн олон хэсгийг үргэлжлүүлэн авах боломжтой эсэхийг асуухад Soyou дотроо өөрийгөө тайвшруулж байсан тухайгаа хэлжээ.
Тэрээр “Би дотроо байнга ‘Өвдөхгүй байна’ гэж өөртөө хэлж байсан” гэж ярьсан байна.
Soyou-ийн гурав дахь EP “Off Hours” дөрөвдүгээр сарын 29-нд гарсан юм.
