Эммигийн улаан хивсэн дээрх “өөрчлөлттэй” төрх
Жүжигчин Кэтрин О’Харагийн гэнэтийн үхлийн тухай мэдээ нийтэд түгэсний дараа түүний улаан хивсний сүүлчийн гарч ирэлт дахин сөхөгдөж, олон хүний уй гашуу, эргэлзээг нэмэгдүүлж байна.
Кэтрин О’Хара 2025 оны есдүгээр сард Лос Анжелес хотод болсон Primetime Emmy Awards ёслолд оролцсон нь олон нийтийн өмнө албан ёсоор үзэгдсэн сүүлчийн тохиолдол болж үлдэв. Тухайн үед тэр өмнөх жилүүдтэйгээ харьцуулахад мэдэгдэхүйц туранхай, биеийн хэлбэр огцом өөрчлөгдсөн байдалтай харагдсан нь шүтэн бишрэгчдийн дунд анхнаасаа багагүй анхаарал, санаа зовнил төрүүлсэн.
Өндөр банзалтай, биед барьсан загварын дээд хэсэг нь түүний маш нарийхан гар, тод томруун бэлхүүсийг улам тодотгож байв. Царай, хүзүүний шугам нь илүү шовх, өнцөгтэй харагдаж, мөрөн дээгүүрээ унжсан улаавтар үс нь ердийнхөөсөө илүү эмзэг, турж эцсэн мэт төрхийг нь улам тодруулсан талаар тухайн үеийн фото сурвалжууд онцолж байлаа.
Тухайн үед олон хүн үүнийг жингийн жирийн хэлбэлзэл, хувийн хэв маягийн өөрчлөлттэй холбон харж байсан ч, түүний таалал төгссөн тухай мэдээлсний дараа уг дүрс бичлэг, гэрэл зургууд цахим орчинд дахин цацагдаж, “эрүүл мэндийн ноцтой асуудлын дохио аль хэдийн ил байжээ” гэх сэтгэгдэл хөвөрч эхэлсэн.
SXSW 2025: Жин буурсан нь анх удаа илт мэдрэгдсэн үе
Кино, телевизийн салбарынханд О’Харагийн жингийн өөрчлөлт Эммигээс ч өмнө анзаарагдаж эхэлсэн байж болзошгүй. 2025 оны гуравдугаар сард Техасын Остин хотод болсон SXSW 2025 арга хэмжээний үеэр түүнийг авсан зургууд дээр Кэтрин ер бусын турсан, жижигхэн биетэй харагдаж байв.
Бие галбиртаа яг таарсан хар даашинзтай, уламжлалт гоёмсог хэв маягаа хадгалсан ч ердийнхөөсөө хамаагүй хөнгөн, жин буурсан нь нүднээ ил байсан гэж орон нутгийн хэвлэл мэдээлэл мэдээлж, “сүүлийн хоёр жилийн хугацаанд түүний жин тогтвортой буурч байсан” гэж тэмдэглэж байв.
Богино хугацааны өвчний дараах гэнэтийн үхэл
Орон нутгийн цагаар нэгдүгээр сарын 30-нд Кэтрин О’Хара Лос Анжелес хотын Брентвуд дүүрэг дэх гэртээ нас нөгчжээ. Түүний төлөөлөгч агентлаг CAA “Тэр богино хугацааны өвчний дараа таалал төгссөн” хэмээн албан мэдэгдэлд дурдсан ч өвчний онош, нарийн шалтгааныг ил болгохоос татгалзсан байна.
Талийгаачийн ард нөхөр Бо Уэлч, хөвгүүд Мэттью, Люк, мөн таван ах дүү нь үлдэж байгаа. Гэр бүлийнхэн нь түүний дурсгалыг өргөн олон нийтэд бус, хаалттай, хувийн шинжтэй дурсгалын арга хэмжээгээр хүндэтгэх шийдвэр гаргасан гэж мэдээлжээ.
Домогт дүрүүд нь үе үеийн үзэгчдэд үлдэх болно
Кэтрин О’Хара дэлхий даяар “Гэртээ ганцаараа” цувралын Кевиний ээж Кейт МакКаллистерын дүрээрээ танигдаж, гэр бүлийн киноны “мөнхийн ээж” хэмээн нэрлэгдэх болсон. Үүнээс гадна “Schitt’s Creek” цувралын эксцентрик Мойра Роузын дүр нь түүний карьерын хоёр дахь оргил гэж хэлж болох, орчин үеийн телевизийн хамгийн мартагдашгүй эмэгтэй дүрүүдийн нэг болж үлдлээ.
Түүний “Beetlejuice”, “Best in Show”, “A Mighty Wind” зэрэг кинонууд дахь өвөрмөц, нарийн хошин мэдрэмжтэй дүрүүд өнөөдрийг хүртэл шүтэн бишрэгчдийн дурсамжинд тод байсаар байна.
2020 онд Кэтрин О’Хара “Schitt’s Creek” цувралын бүтээлээрээ инээдмийн цувралын шилдэг гол дүрийн эмэгтэй жүжигчин шагналыг Primetime Emmy Awards-аас хүртэхдээ:
“Миний үеийн эмэгтэйд жинхэнэ амьдралыг мэдрүүлсэн дүрд тоглосондоо би талархаж байна”
хэмээн хэлж байсан. Одоо энэ үгс нь түүний олон арван жилийн уран бүтээлийн замналыг нэг мөрөнд багтаасан, сүүлчийн томоохон мессеж болон үлдэж байна.
