Дэлхийн Поп Од Хувийн Амьдралдаа Томоохон Алхам Хийлээ
Америкийн алдартай дуучин, ая зохиогч, жүжигчин Майли Сайрус дөрвөн жилийн турш үерхэж буй хөгжимчин Макс Морандотой сүй тавьсан баярт мэдээгээ зарлалаа.
Грэммийн наадмын гурван удаагийн шагналт дуучин Даваа гарагт Лос-Анжелес хотод болсон “Avatar: Fire and Ash” киноны нээлтийн ёслолд ирэхдээ хуруундаа алмаазан шигтгээтэй алтан бөгж зүүсэн нь папараци болон олны анхаарлыг татсан юм.
Азийн Аялал ба Гэнэтийн Сюрприз
Өдгөө 33 настай М.Сайрус Лхагва гарагт Америкийн “Good Morning America” хэмээх телевизийн шоунд ярилцлага өгөх үеэрээ сүй тавьсан тухайгаа дэлгэрэнгүй хуваалцсан. Тэрээр найз залуу нь саяхан Ази руу хамт хийсэн аяллынх нь үеэр санал тавьсан гэдгийг дурдсан. Дуучин бүсгүй сэтгэл хөдлөлөө илэрхийлэхдээ:
“Намайг гайхшируулна гэдэг амаргүй, учир нь би бүх нөхцөл байдлыг хяналтдаа байлгах дуртай хүн. Харин би энэ явдалд маш, бүр маш ихээр гайхсан”
Өмнөх Гэрлэлт ба Шинэ Хайр
“Flowers”, “Party in the U.S.A” зэрэг хит дуунуудаараа танигдсан М.Сайрус өмнө нь 2018 онд Австралийн жүжигчин Лиам Хемсворттой гэрлэж байсан. Тэдний 10 жил үргэлжилсэн үерхэл 2019 онд дуусгавар болж, хосууд салж байгаагаа зарлаж байв.
Түүний шинэ сүйт залуу 27 настай Макс Морандо нь Лос-Анжелесын “Liily” хамтлагийн бөмбөрчин юм. М.Сайрус 2023 онд Британийн “Vogue” сэтгүүлд ярилцлага өгөхдөө М.Морандотой “сохор болзоо”-оор танилцсан гэдгийг дурссан. М.Морандогийн хамтлаг 2022 онд М.Сайрусын хөтөлсөн NBC телевизийн шинэ жилийн нэвтрүүлэгт түүний загалмайлсан эх Долли Партон зэрэг уран бүтээлчдийн хамт оролцож байжээ.
Хамтын Амьдрал ба Урам Зориг
Майли Сайрус нэвтрүүлэгт оролцохдоо сүйн бөгжөө үзүүлээд М.Морандо “сайн сонголт хийсэн” хэмээн тодотгосон. Тэрээр тэдний харилцааны талаар өгүүлэхдээ:
“Макс бид хоёр хамтдаа дөрвөн жилийг өнгөрүүлээд байгаа бөгөөд энэ хугацаанд надад эерэг өөрчлөлтүүд гарсан нь илэрхий байна. “Чи чадна” гэж үргэлж хэлдэг хэн нэгэн хажууд чинь байгаасай хэмээн та бүхэнд хүсэж байна”
Уран Бүтээл: Киноны Дуу ба Аялан Тоглолтоос Татгалзсан Шалтгаан
Поп од Майли Сайрусын хамгийн сүүлд гаргасан уран бүтээл болох “Dream as One” дуу нь “Avatar” уран сайхны киноны хамгийн сүүлийн ангид багтжээ. Тэрээр энэ оны эхээр ес дэх цомгоо гаргасан хэдий ч аялан тоглолт хийх “хүсэлгүй” байгаагаа мэдэгдсэн. Үүний шалтгааныг тайлбарлахдаа, аялан тоглолтын үеэр бие болон сэтгэцийн эрүүл мэндийг хадгалах нь хэчнээн хэцүү байдгийг хуваалцсан байна.
