ENHYPEN хамтлагийн “BLOOD SAGA” дэлхийн аялан тоглолтын шинэ тов зарлагдсаны дараа Хисыны хамтлагаас гарсан нөхцөл байдлын талаар шинэ таамаг, маргаан дэгдээд байна.
BELIFT LAB-аас бараг нэг жилийн хугацааг хамарсан өргөн хүрээний тоглолтын хуваарийг танилцуулсан ч энэ мэдэгдэл Хисыны гарсан асуудалтай давхацсанаар фенүүдийн анхаарлыг татжээ.
Ялангуяа Перугийн Лима хотын тоглолтын постертой холбоотой нэг зураг цахимд тархаж, уг зураг дээр долоон гишүүнтэй дүрслэгдсэн нь маргааныг улам дэвэргэв. Зарим хэрэглэгчид үүнийг Хисын анхнаасаа аялан тоглолтод оролцохоор төлөвлөгдсөн байсан нотолгоо гэж үзэж байна.
Цаашлаад фенүүдийн дунд Хисыны хамтлагаас гарах шийдвэр гэнэтийн, төлөвлөгдөөгүй байсан байж магадгүй гэсэн таамаг өргөн тархжээ. Учир нь тэрээр өмнө нь удахгүй болох тоглолтын талаар өөрөө дурдсан, мөн Европт очих төлөвлөгөөтэй байгааг илэрхийлж байсан нь онцлог болсон байна.
Мөн зарим хэрэглэгчид постерын өөрчлөлт, зураг засварласан байж болзошгүй нөхцөл байдлыг хөндөж, компанийн мэдээлэлд эргэлзэх байр суурийг илэрхийлж байна.
Одоогоор BELIFT LAB болон хамтлагийн зүгээс Хисыны гарсан шалтгааны талаар дэлгэрэнгүй тайлбар өгөөгүй байгаа нь фенүүдийн дунд таамаг, хэлэлцүүлгийг үргэлжлүүлсээр байна.
