Бритни Спирс согтуугаар жолоо барьсан хэргээр баривчлагдсаны дараа түүний хуучин нөхөр Кевин Федерлайн энэ явдлын талаар байр сууриа илэрхийлжээ. Сошиал орчинд зарим хэрэглэгч түүнийг дуучны ээлжит “удаан үргэлжилсэн сэтгэлзүйн уналт”-ын буруутан мэтээр нэрлэж байгаа үед Федерлайнын талаас олон нийтэд мэдэгдэл өгсөн байна.
TMZ-ийн нийтэлсэн мэдээллээр Федерлайны өмгөөлөгч Марк Винсент “Кевин Бритнид хамгийн сайн сайхныг хүсэж байна. Хэрэв түүнд тусламж хэрэгтэй бол тэр тусламж болон хамтран ажиллахыг оролдож буй хүмүүсээс Бритни татгалзахгүй байгаасай гэж найдаж байна. Гол асуудал нь энэ явдал ганц удаагийнх уу, эсвэл цааш дахин давтагдах уу гэдэгт байна” гэж мэдэгдсэн байна. Мөн Федерлайнын тал Спирсийн өмгөөлөгчтэй баривчилгаанаас хойш холбоотой байсан ч, хэвлэлд нийтлэгдсэнээс өөр нэмэлт мэдээлэл тэдэнд байхгүй гэж дурджээ.
“Кевиний ном Бритниг улам дордуулсан” гэх тайлбар гарчээ
Федерлайны мэдэгдлийн дараахан Спирст ойр эх сурвалж Page Six-д ярилцлага өгөхдөө Бритнигийн хууль зөрчихөд Федерлайны дурсамжийн ном нөлөөлсөн гэж үзэж буйгаа хэлсэн байна. Эх сурвалжийн тайлбараар 2025 оны аравдугаар сард гарсан “Та өөрийгөө мэддэг гэж бодсон” нэртэй ном нь дуучныг “огцом уруудал” руу түлхсэн гэжээ. “Сүүлийн саруудад түүний зан байдал улам таамаглашгүй болсон. Кевиний ном түүнийг бүрмөсөн тэвчээр алдуулж, тэр үеэс бүх зүйл уруудан унасан. Энэ нь түүний сэтгэлзүйн байдалд маш хүчтэй нөлөөлсөн” гэж уг эх сурвалж хэлсэн байна.
Баривчилгааны явц, шинжилгээ, шүүхийн огноо
Сүүлийн өдрүүдэд Бритни Спирсийг BMW машинаар хурдны зам дээр эгнээнээс эгнээ рүү савлаж явсан гэж үзэн цагдаа нар саатуулсан. Цагдаагийнхан дуучин архи болон мансууруулах бодисын холимгийн нөлөөн дор байсан байж болзошгүй гэж сэжиглэж, эмнэлэгт хүргүүлэн эмнэлгийн үзлэг, шинжилгээ хийлгэсэн гэж мэдээлжээ. Түүнийг саатуулаад гурван цагийн дараа сулласан байна. Мөн машины дотор “тодорхойгүй бодис” илэрч, одоогоор лабораторид шинжилж байгаа гэж эх сурвалжууд мэдээлсэн. Бритни Спирс 5-р сарын 4-нд шүүхэд дуудагдана.
Номонд дурдсан хүнд буруутгал, Бритнигийн хариу
Федерлайны ном гарснаас хойш таван сарын дараа энэ баривчилгаа тохиолдсон гэж нийтлэлд дурдсан байна. Тус номонд Федерлайн Бритниг мансууруулах бодис хэрэглэдэг байсан гэж мэдэгдсэн бөгөөд тэрээр дуучин хоёр хүүгээ хөхүүлж байх үедээ хүртэл кокаин хэрэглэсэн, мөн “хэвийн бус” авир гаргаж байсан тухай ноцтой зүйлс бичсэн гэж мэдээлжээ. Тухайлбал шөнөөр хөвгүүдийнхээ унтлагын өрөөний үүдэнд хутгатай зогсож байсан гэх мэт жишээг дурдсан байна.
Харин Бритни Спирс Федерлайны бүх буруутгалыг үгүйсгэж, хуучин нөхрөө өөрийнх нь зовлон шаналлыг ашиглан мөнгө олж байна гэж буруутгасан гэж нийтлэлд бичжээ. Мөн ном гарсны дараахан тэр ресторанд орсныхоо дараа машинаар хүнийг мөргөх шахсан тохиолдол гарсан гэж дурдсан бөгөөд түүнийг шампанскийн хундагатай ресторангаас гарч явахад нь харсан зураг, мэдээлэл цахим орчинд дахин түгшүүр үүсгэсэн гэжээ.
