Дуучин Чонха 2026 оны есдүгээр сарын 18-ны өглөө гэнэт бие нь муудсаны улмаас яаралтай эмнэлэгт хүргэгдсэн байна. Одоогоор тэрээр яаралтай тусламжийн тасагт эмчилгээ хийлгэж байгаа бөгөөд эмч нарын хяналтад хэвээр байна.
Эмнэлэгт хэвтсэнтэй холбоотойгоор Чонха есдүгээр сарын 18-нд Кёнги их сургуулийн Сөүл кампуст болох оюутны “Gwiryongje” фестивальд оролцох боломжгүй болжээ.
Түүнчлэн есдүгээр сарын 19-нөөс эхлэх “KB Joy Olpark Festival 2026” арга хэмжээнд оролцох эсэх нь одоогоор тодорхойгүй хэвээр байна.
Чонхагийн харьяалагддаг MORE VISION агентлаг уран бүтээлч эмнэлэгт хүргэгдсэн болохыг албан ёсны мэдэгдлээр баталсан байна. Тус агентлаг хуваарь гэнэт өөрчлөгдсөнд фестивалийн зохион байгуулагчид болон фэнүүдээс уучлалт хүсэж, дуучныг аль болох хурдан эдгэрэхэд шаардлагатай бүх дэмжлэгийг үзүүлнэ гэдгээ мэдэгджээ.
Гэхдээ Чонхад яг ямар онош тавьсан, биеийн байдал нь ямар шалтгаанаар огцом муудсан талаар агентлагийн мэдэгдэлд дэлгэрэнгүй мэдээлээгүй байна.
MORE VISION мэдэгдэлдээ:
“Өнөөдөр өглөө эрт манай агентлагийн уран бүтээлч Чонха эрүүл мэндийн асуудлын улмаас яаралтай тусламжийн тасагт хүргэгдсэн бөгөөд одоогоор тэнд эмчилгээ хийлгэж байна.
Үүнтэй холбоотойгоор тэрээр өнөөдөр буюу 18-ны өдөр Кёнги их сургуулийн Сөүл кампуст болох Gwiryongje фестивалийн төлөвлөгдсөн тоглолтод оролцох боломжгүй болсныг мэдэгдэж байна.
Түүний тоглолтыг хүлээж байсан их сургуулийн төлөөлөгчид болон оюутнуудад энэхүү гэнэтийн мэдээгээр санаа зовнил, хүндрэл учруулсандаа чин сэтгэлээсээ уучлалт хүсэж байна. Манай компани уран бүтээлчийг аль болох хурдан эрүүл мэндээ сэргээхэд нь туслахын тулд бүх боломжоо дайчлан ажиллах болно”
хэмээн мэдээлжээ.
Одоогоор агентлаг болон их сургуулийн оюутны зөвлөлийн аль аль нь Чонхагийн биеийн байдал муудсан тодорхой шалтгаан, эмчийн оношийг нийтэд зарлаагүй байна. Албан ёсны мэдээлэлд зөвхөн “эрүүл мэндийн асуудлын улмаас” гэх тайлбар өгсөн бөгөөд дуучин эмнэлэгт эмч нарын хяналтад байгаа аж.
Энэ явдал Чонха MORE VISION агентлагтай байгуулсан хамтын ажиллагаагаа албан ёсоор дуусгахаас хэдхэн хоногийн өмнө тохиож байна.
MORE VISION есдүгээр сарын 14-нд Чонхатай байгуулсан гурван жилийн онцгой гэрээний хугацаа дуусаж, талууд харилцан тохиролцсоны үндсэн дээр 2026 оны есдүгээр сарын 21-нд гэрээгээ дуусгахаар болсныг мэдэгдсэн юм.
