“Гэртээ ганцаараа”-гийн “кино ээждээ” зориулсан салах ёс
“Home Alone” кинонд ээж, хүүгийн дүрийг бүтээж хамтран тоглосон Маколей Калкин, Кэтрин О’Харагийн таалал төгссөн тухай мэдээ түгэсний дараа түүний дурсгалыг маш хувийн, сэтгэл хөдөлгөм үгсээрээ хүндэтгэн дурсан бичлээ.
Нэгдүгээр сарын 30-нд жүжигчний менежер People сэтгүүлээр дамжуулан Кэтрин О’Хара нас барсан тухай албан мэдэгдэл хийсэн. Сүүлийн жилүүдэд карьераа дахин идэвхжүүлж, олон уран бүтээлээрээ үзэгчдийн мэлмийд харагдаж байсан түүнийг тэсэн ядан хүлээдэг шүтэн бишрэгчид болон хамтран ажиллаж байсан уран бүтээлчид энэ гэнэтийн мэдээг гүн эмгэнэлтэйгээр хүлээн авч байна.
“Кинон дээрх хурцадмал харилцаа”-наас бодит амьдрал дахь халуун дотно холбоо хүртэл
“Гэртээ ганцаараа” кинонд Кевин МакКаллистер болон түүний ээж Кейт МакКаллистерын харилцаа заримдаа хурц, үл ойлголцолтой байдлаар дүрслэгддэг ч бодит амьдрал дээр хоёр жүжигчин олон жилийн турш бие биенээ гүн хүндэлж, үнэлж иржээ.
Кэтрин О’Хара 2023 онд Маколей Калкины Холливудын алдрын гудамж дахь одны ёслолд биечлэн оролцож, тайзан дээрээс түүнийг магтан сайшаан, хайр, хүндэтгэлээ илэрхийлсэн билээ. Калкин ч мөн хариуд нь түүнийг “кино ертөнц дэх төгс ээжийн дүрийн нэг” хэмээн онцолж, олон жилийн нөхөрлөлийнхөө үнэ цэнийг илэрхийлж байсан.
Инстаграм дахь сүүлчийн “Ээж ээ” хэмээх захидал
Кэтрин О’Харагийн нас барсны дараа Маколей Калкин өөрийн Инстаграм хуудсаараа дамжуулан хамтран тоглож байсан үеийн болон сүүлийн жилүүдийн хамтын зургуудаа хуваалцаж, тэдгээрийн хамт дараах үгсийг нийтэлжээ.
“Ээж ээ.
Бидэнд илүү их цаг байгаа гэж бодсон.
Би илүү ихийг хүсч байсан.
Би таны хажууд сандал дээр суумаар байсан.
Би таныг сонссон.
Гэхдээ надад хэлэх зүйл маш их байсан.
Би танд хайртай.
Дараа уулзъя.”
Эдгээр мөрнүүд нь “Гэртээ ганцаараа” киноны бэлгэ тэмдэг болсон ээж, хүү хоёрын дэлгэцийн харилцаа олон жилийн турш жинхэнэ хүний холбоо болон үргэлжилснийг, мөн түүний хувьд Кэтрин зөвхөн хамтран тоглогч биш, үнэхээр “ээж” шиг хүн байсныг илтгэн харууллаа.
Шүтэн бишрэгчид “мянганы ээж”-дээ салах ёс гүйцэтгэж байна
Калинкын постын доорхи сэтгэгдлийн хэсэгт дэлхийн өнцөг булан бүрээс шүтэн бишрэгчид эмгэнэл, дурсамжаа илэрхийлсэн байна. “Тэр бол үүрд мөнхийн мянганы ээж”, “Жүжигчин хүний хувьд түүнийг үнэхээр хайрладаг байсан”, “Таны гарз хохиролд гүн эмгэнэл илэрхийлье”, “Ноён, хатагтай МакКаллистер хоёрын түүх миний хүүхэд насыг чимсэн” гэх зэргээр олон мянган сэтгэгдэл үлджээ.
Олон нийт Кэтрин О’Хараг “хатагтай МакКаллистер” гэх дүрээр нь үргэлж дурсахын зэрэгцээ түүний кино урлагт оруулсан хувь нэмэр, онцгой хошин мэдрэмж, дулаахан дүрүүдийг нь дахин дахин эргэн санаж байна.
